Дэлхийн дархлаажуулалтын долоо хоног дөрөвдүгээр сарын 24-30 өдрүүдэд үргэлжилж байна.

Дэлхийн улс орнуудад Ковид-19-ын цар тахлаас шалтгаалан маш олон хүүхдүүд товлолын дархлаажуулалтаас хоцорсон. Манай улсад сүүлийн таван жил УГУ вакцины бүрэн тунгаас 69163 хүүхэд хоцорсон байгаа нь улаанбурхан өвчин зөөвөрлөгдөн ирсэн тохиолдолд томоохон дэгдэлт үүсэж болзошгүй нөхцөл байдлыг үүсгэж байна. 

• Улаанбурхан дэлхий дээр хамгийн хурдан тархдаг өвчнөөр бүртгэгдсэн.
• Улаанбурханы дархлаажуулалтад хамрагдаагүй 10 хүний 9 нь өвддөг нь тогтоогдсон.
• Агаар дуслын замаар хүнээс хүнд амьсгалах, ханиах, найтаах үед халддаг вирусийн гаралтай халдварлалт бөгөөд маш өндөр халуурч, тууралт өгөх шинж тэмдгээр илэрдэг.

Дэлхий дахинд 2022 онд 182 улс оронд улаанбурхан өвчний 172,084 тохиолдол бүртгэгдсэн бол 2023 оны эхний гурван сарын байдлаар 103 улс оронд 22,510 тохиолдол бүртгэгдээд байгаагийн дунд хил залгаа ОХУ-ын Буриад улсын Хиагт хотод энэ сард хоёр тохиолдол батлагдсан байна.

Иймээс УГУ вакцинаас хоцорсон 15 хүртэлх насны хүүхдээ харьяалал харгалзахгүй сум, өрхийн ЭМТ-д нөхөн вакцинд хамруулаарай. 

Түүнчлэн сүүлийн таван жилд халдварт саагийн эсрэг вакцины бүрэн тунгаас хоцорсон 22,607 хүүхэд байна. 

Иймд халдварт саагийн эсрэг вакцинаас хоцорсон хүүхдийг нөхөн дархлаажуулалтад хамруулаарай.

 

---