Эрдэнэт үйлдвэр ТӨҮГ  “Пургон”-ийг 800 мянга, “Лексус 570”-ыг 15 сая, “Mercedes-Benz”-ийг 3.5 сая, “Toyota Hiace” машиныг 4 сая төгрөгөөр акталж, хувьчилжээ. Энэ талаар Төрийн өмчийн бодлого, зохицуулалтын газрын дарга Б.Цэнгэлээс тодрууллаа.

Төрийн өмчийн бодлого, зохицуулалтын газрын дарга Б.Цэнгэл:

-Эрдэнэт үйлдвэрийн машины асуудал 2021 онд гарсан. Эрдэнэт үйлдвэр элэгдлээрээ өртгөө нөхсөн, цаашид ашиглах боломжгүй, ашиглахад өртөг шаардагдах гэх зэрэг асуудлаар актлах саналаа хүргүүлж байсан. Актлах саналыг хоёр удаа буцааж байсан. 2021 оны сүүлээр дахин энэ асуудал ирсэн. Тус саналд “Лексус 570”-ыг 15 сая төгрөгөөр актлах тухай байгаагүй. Ингэхдээ хэлтсийн даргадаа хянуулалгүй дунд нь “Лексус 570”-ыг хавчуулсан байдаг.

АТГ-т энэ асуудлыг шалгуулсан. Тухайн мэргэжилтнийг ажлаас нь халсан. Одоо хэрэг Прокуророос шүүх рүү шилжих процесстой байгаа. Эрдэнэт үйлдвэрийн удирдлагууд 15 сая төгрөг гэх тоог мэдээгүй. Энэ асуудлаар үйлдвэрийн ерөнхий менежерт хариуцлага тооцуулж, ерөнхий нягтлан бодогчийг ажлаас нь халсан. Хэд хэдэн хүнд яллах дүгнэлт үйлдсэн байгаа гэлээ. 

---