Өмнөд Солонгосын "Mom's Touch" түргэн хоолны сүлжээ ресторан манай улсын "Foodville Farm" ХХК-тай мастер франчайзын гэрээ байгуулснаа мэдэгджээ.

Монголд аль хэдийн тус улсын "Caffe Bene", "Tous les Jours" зэрэг томоохон франчайзуудыг оруулж ирсэн "Монбейкери" ХХК нь "Mom's Touch" брэндийг манай улсад өргөжүүлэх зорилгоор "Foodville Farm" гэх бие даасан компанийг үүсгэн байгуулсан аж. Тахианы махтай бургерээр дагнадаг тус сүлжээ рестораны Монгол дахь анхны салбар энэ оны эхний хагаст нээлтээ хийх бол оны эцэс гэхэд дахиад тав гаруй салбарыг нэмж нээхээр төлөвлөж байгаа гэжээ.

Монголчуудын дунд солонгос хоол хүнс, К-поп хөгжим болон бусад өргөн хүрээний бүтээгдэхүүний талаарх сонирхол нэмэгдэж байгаагаас гадна манай улсын эдийн засгийн хурдацтай өсөлт, харьцангуй залуу хүн ам гэх мэт шалтгааны улмаас "Mom's Touch" франчайз Монголын зах зээлд нэвтрэхээр шийдсэн гэж тус улсын хэвлэлүүдэд мэдээлсэн байна.

Эх сурвалж: Yonhap News Agency

---