Сүхбаатар аймгийн Эрдэнэцагаан сумын нутаг дэвсгэрээс гарсан түймэр хүчтэй салхины улмаас Дорнод аймгийн Матад сумыг дамжин Халхгол сумын нутгийн дийлэнх хэсгийг хамраад байна. Хүчтэй салхины улмаас түймэр хурдтай тархаж аюултай үзэгдлийн хэмжээнд хүрчээ.

Сүхбаатар аймгийн Эрдэнэцагаан сумын Хадын булаг багийн Уртын цагаан гэх газар энэ сарын 8-ны өдрийн 11:30 цагт ой хээрийн түймэр гарчээ. Улмаар Дорнод аймгийн Матад сумын нутагт орж ирсэн мэдээг өнгөрсөн шөнө 00:00 цагт Дорнод аймгийн Онцгой байдлын газар хүлээн авсан байна.

Мэдээлэл, дуудлагын дагуу Дорнод аймгийн Онцгой байдлын газрын Шуурхай бүлгийг Матад, Халхгол сумд руу илгээжээ. Мөн Сүхбаатар аймгийн Онцгой байдлын газрын албан хаагчид, тус аймгийн Эрдэнэцагаан сумын гал унтраах бүлэг, Халхгол сумын Онцгой байдлын ангийн гал унтраах бүлэг Халхгол, Матад сумдын иргэдээс бүрдсэн гал унтраах бүлгүүд, “Петро Чайна Дачин Тамсаг” ХХК-ийн ажилтнуудаас бүрдсэн нийт 260 гаруй хүн түймрийн голомтод иргэд, малчид, айл өрх, мал, эд хөрөнгийг хамгаалах, түймрийг унтраахаар ажиллаж байна. Түймэр Халхгол сумын нийт нутагт тархжээ.

Хариу арга хэмжээг цаг алдалгүй авч байгаа хэдий ч цаг агаарын нөхцөл байдлаас шалтгаалан салхины хурд секундэд 12-19 метр хүрч ширүүсэн, салхины чиг өөрчлөгдөж байгаагаас галын тархац их болжээ. Мөн хүчтэй салхины улмаас байгалийн аюултай үзэгдлийн хэмжээнд хүрсэн тул аймгийн Онцгой комиссоос хүсэлт гаргасан. Онцгой байдлын ерөнхий газрын харьяа Үндэсний аврах бригадаас нисдэг тэргээр 30 аврагчийг Халхгол сум руу тээвэрлэж байна. Мөн Хэнтий аймгийн Онцгой байдлын аврах, гал унтраах ангийн алба хаагчид нэмэлтээр ирж ажиллаж байна.

Дээрх нөхцөл байдалтай холбогдуулан Дорнод аймгийн Онцгой комисс шуурхай хуралдаж:

-Зэвсэгт хүчний 327 ангийн мэргэжлийн бүлгийн 50 албан хаагчийг тус сумдад дайчлан ажиллуулах бэлэн байдлыг хангах,
-Бүсийн оношилгоо эмчилгээний төвөөс эрүүл мэндийн бүлгийг томилж ажиллуулах,
-Түймэр унтраахаар ажиллаж буй алба хаагч, иргэдэд хүнс, ундны усны хангамжийн дэмжлэг үзүүлэх шийдвэрийг тус тус гаргажээ.

Өнөөдрөөс эхлэн Дорнод аймгийн нийт нутгаар салхи их төлөв баруунаас секундэд 12-19 метр хүрч ширүүснэ. Иймд Малчид, тээвэрчид,  иргэд та бүхэн болзошгүй эрсдэлийг тооцоолж, үнс нурмыг ил задгай асгахгүй байх, ил задгай тамхи татахгүй байж ой хээрийн түймрээс урьдчилан сэргийлж, сонор сэрэмжтэй байхыг анхааруулав.

---