ЭМЯ болон НҮБ-ын Хүүхдийн сангийн хамтран хэрэгжүүлэх Эрүүл мэнд, хоол тэжээл, хүүхэд хөгжлийн үйл ажиллагааны 2023 оны төлөвлөгөөг баталж Эрүүл мэндийн сайд С.Чинзориг НҮБ-ын Хүүхдийн сангийн Суурин төлөөлөгч Эваристе Коуасси-Комплан нар өнөөдөр /2023-04-04/ гарын үсэг зурав.

НҮБ-ын Хүүхдийн сан эрүүл мэндийн салбарт эх, нярай болон бага насны хүүхдийн эрүүл мэндийг хамгаалах, нярайн эндэгдлийг бууруулах, товлолт вакцины хамрагдалтыг нэмэгдүүлэх, өсвөр насныхны эрүүл мэндийн боловсрол, ариун цэвэр, усан хангамжийг сайжруулах чиглэлээр тодорхой төсөл хөтөлбөрүүдийг хэрэгжүүлж ирсэн.
Энэ онд хэрэгжүүлэх төлөвлөгөөнд эх, нярай, хүүхдийн эрүүл мэндийн анхан шатны тусламж, үйлчилгээний чанар, хүртээмжийг сайжруулахад чиглэсэн олон талт хамтын ажиллагааг өрнүүлж, анхан шатны тусламж үйлчилгээний стандартыг шинэчлэх багтжээ. Мөн сэтгэцийн болон нийгэм-сэтгэл зүйн дэмжлэг, амны хөндийн эрүүл ахуй, олон нийтэд түшиглэсэн эх, хүүхдийн эрүүл мэндийн үйлчилгээ, орчны эрүүл мэндийн болон өсвөр үед ээлтэй тусламж үйчилгээг анхан шатны тусламж үйлчилгээнд нэвтрүүлэх ажилд арга зүйн дэмжлэг үзүүлнэ. Хоол тэжээлийн нэн шаардлагатай тусламж үйлчилгээг эрүүл мэндийн салбарт түгээн дэлгэрүүлэхэд дэмжлэг үзүүлэх "Эхийн сүүгээр хооллолтыг дэмжих 10 алхам", Эхийн сүүний банк байгуулах, эх хүүхдийн хооллолтын зөвлөгөө өгнө. Мөн аминдэм эрдэс бодисын хангалт, хоол тэжээлийн цочмог дуталтай хүүхдийг эрт илрүүлэх, эмчлэхэд дэмжлэг үзүүлэх зэрэг үйл ажиллагааг явуулахаар тусгажээ.

Түүнчлэн хүүхдэд ээлтэй, уур амьсгалын өөрчлөлтөд тэсвэртэй ус хангамж, ариун цэвэр, эрүүл ахуйн байгууламжийг сумдын Эрүүл мэндийн төвд барьж байгуулах болон Эрүүл мэндийн төвүүдийн усан хангамж, ариун цэврийн байгууламжийн ашиглалт, үйлчилгээний чадавхи, тогтвортой байдлыг хангахад дэмжлэг үзүүлэх асуудлууд багтжээ.

---