Төв аймгийн Баянхангай сумын Хөшөөт багийн “Цав хангай” гэдэг газарт "хоёр давхар цайны газрын барилга шатаж байна" гэсэн дуудлагыг 04 дүгээр сарын 02-ны өдрийн 16:41 цагт Төв аймгийн Онцгой байдлын газар хүлээн авчээ.

Нийслэлийн Баянгол дүүргийн Онцгой байдлын хэлтсийн Гал түймэр унтраах, аврах 18 дугаар ангийн алба хаагчдыг очиход иргэн У-ын 8х10 метрийн хэмжээтэй зоогийн газрын хоёр давхар барилга шатсаны улмаас иргэн Т-ын 20х14 метрийн хэмжээтэй дэлгүүрийн нэг давхар барилга, иргэн О-ын 12х14 метрийн хэмжээтэй дэлгүүрийн хоёр давхар барилга, иргэн Э-ийн 10х11 метрийн хэмжээтэй зоогийн газрын хоёр давхар барилга тус тус шатаж дууссан байжээ.

Улмаар иргэн Г-ын 8х9 метрийн хэмжээтэй зоогийн газрын хоёр давхар барилга, иргэн Г-ийн 3х6 метрийн хэмжээтэй “Дугуй засвар”-ын нэг давхар барилга шатаж байсныг 40 минут ажиллаж унтраасан байна. Гал түймэр дамжин нийт зургаан барилга шатсан хэрэг гарчээ.

---