УИХ-ын Халдашгүй байдлын дэд хороо Т.Аюурсайхан, Д.Бат-Эрдэнэ, Н.Наранбаатар нарын бүрэн эрхийг түдгэлзүүлэх ерөнхий прокурорын саналыг хаалттай хэлэлцсэн. Тус саналыг оруулж ирсэн Улсын Ерөнхий прокурор Б.Жаргалсайханаас зарим зүйлийг тодрууллаа.

Улсын Ерөнхий прокурор Б.Жаргалсайхан:

-Түдгэлзүүлэх үндэслэл гэдэг нь мөрдөн шалгах ажиллагааг саадгүй явуулах боломжийг олгож байна гэсэн үг. УИХ-ын тухай хуулийн 9.8-р зүйлд гишүүнийг баривчлах, албадан саатуулах, үзлэг, нэгжлэг хийх шаардлага үүсдэг. Өнөөдөр мөрдөн шалгах ажиллагааны явцад зайлшгүй үзлэг, нэгжлэг хийх шаардлага үүсэхээр байна. Үүнд гишүүний бүрэн эрх саад болохоор байгаа. Тийм учраас түдгэлзүүлэх саналыг оруулж ирсэн.

Мөрдөн шалгах ажиллагаа явагдаж байна. Нотлох баримт тогтоогдсон учир яллагдагчаар татсан. Энэ бол эцсийн шийдвэр биш гишүүд яллагдагчаар татсан үндэслэлийг үгүйсгэх нотлох баримтыг гаргаж ирж болно. Гишүүд “хэлмэгдсэн байна” зэрэг ярих нь тухайн хүний асуудал гэв. 

---