УИХ-ын чуулганы баасан гаригийн хуралдаанаар Хөдөлмөр нийгмийн хамгааллын сайд Т.Аюурсайханыг чөлөөлөх тухай асуудлыг  шийдвэрлэхийн зэрэгцээ УИХ-ын Төрийн байгуулалтын байнгын хорооны даргыг томилох асуудлыг хэлэлцэнэ.

Төрийн байгуулалтын байнгын хорооны даргаар ажиллаж байсан Ж.Мөнхбатыг УИХ-ын гишүүнээс өчигдөр чөлөөлсөн. Иймд тус байнгын хорооны даргаар УИХ-ын гишүүн Н.Энхболдыг сонгох тухай асуудлыг хэлэлцлээ. Хуралдаанд оролцсон нийт гишүүдийн олонх Н.Энхболдыг Төрийн байгуулалтын байнгын хорооны даргаар сонгохыг дэмжлээ. Улмаар байнгын хорооны даргыг сонгох УИХ-ын тогтоолыг баталлаа. Мөн УИХ-ын гишүүн Д.Сарангэрэлийг Төрийн байгуулалтын байнгын хорооны гишүүнээр батлав. 

Өнөөдрийн чуулганы хуралдаанаар “Женев хотноо 1958 онд баталсан “Дугуйт тээврийн хэрэгслүүд, тэдгээрт суурилуулан ашиглаж болох тоног төхөөрөмж, эд ангид зориулсан НҮБ-ын уялдуулан тохируулсан техникийн дүрмийг хэрэглэх болон эдгээр дүрэмд үндэслэн олгосон баталгааг харилцан хүлээн зөвшөөрөх нөхцөлийн тухай хэлэлцээр”-ийг соёрхон батлах тухай хуулийн төслөөр санал хураах ёстой байсан ч хойшлуулав. 

Үргэлжлүүлэн Хууль тогтоомжийн тухай хуульд өөрчлөлт оруулах хуулийн төслийг хэлэлцэх эсэхийг хэлэлцэж байна. 

---