ОХУ-ын иргэн Батыр Боромангнаевыг Монгол Улсын хилээр нэвтрүүлээгүй шалтгааны талаар Гадаад харилцааны сайд Б.Батцэцэг мэдээлэл өгөв.

Гадаад харилцааны сайд Б.Батцэцэг:

-ОХУ-ын иргэн хоёрдугаар сарын 23-ны өдөр Хүннү Эйр компанийн онгоцоор Монгол Улсад ирсэн. Гадаад паспортын хугацаа дууссан учир хилийн зурваст зургаа хоносон. Манай төрийн байгууллагууд хуулийн хүрээнд ажиллаж, баримт бичгийн зөрчилтэй ирсэн Халимаг иргэнийг улсын хилээр нэвтрүүлээгүй. Харин тус иргэнийг өнөөдөр 12:45 цагт өөрийнх нь хүсэлтээр Монгол Улсаас гаргасан. Хувь хүний хүсэлтээр тухайн иргэнийг хаашаа явсан талаар мэдээлэл өгөх боломжгүй.

Манай улс ямар олон улсын гэрээ конвенцод нэгдсэн байгааг нэн тэргүүнд баримтална. Засгийн газрын авч хэрэгжүүлж буй "Таван Ш" арга хэмжээний хувьд хэрэгт холбогдсон, яллагдагчаар татагдсан, интерполоор эрэн сурвалжилж буй үед гаднын улс орнууд дэмжлэг туслалцаа үзүүлнэ.

Мөн манай улс Дүрвэгсдийн олон улсын конвенцод нэгдээгүй бөгөөд тус халимаг иргэнд хүмүүнлэгийн бүхий л тусламжийг үзүүлсэн. Тус иргэн өөр улс руу явахыг хүсэлтэй байгаагаа илэрхийлсэн тул НҮБ-ын харьяа байгууллагуудад хандсан. Олон улсын гэрээ конвенцод тусгасны дагуу тус иргэний эрхийг зөрчөөгүй гэв.

 

---