Монголын зохиолчдын эвлэлээс анх санаачлан зохион байгуулсан уран зохиолын оны шилдэг бүтээл шалгаруулах "Алтан өд" ёслол энэ жил 21 дэх жилдээ амжилттай болж өндөрлөлөө.

Ёслолын ажиллагааг нээж МЗЭ-ийн дарга, СГЗ, Болор цомын эзэн, яруу найрагч Б.Ичинхорлоо үг хэлж, "Алтан Өд-2022" ёслолд хүрэлцэн ирсэн зочдод МЗЭ-ийн “2022 ОНЫ ОНЦЛОХ 10 АЖИЛ”-ыг танилцууллаа.

Мөн утга зохиолын шинэ үеийн залуусыг тодруулах ШИНЭ ДАВЛАГАА төслийг танилцуулж, "Агаст тэнгэр" , "Нандир" хэвлэлийн компани хэвлэсэн залуу найруулагч, шүүмжлэгч Э.Дашзэвэг, залуу яруу найрагч Ц.Номуундарь нарын анхны номын дээжийг Үндэсний Номын санд хандивлалаа.

-Яруу найргийн төрөлд 17 бүтээл ирснээс Яруу найрагч Д.Эрдэнэзулайн "Авгалдайн суурин", 

-Хүүрнэл зохиолын том хэмжээний бүтээлийн төрөлд 7 бүтээл ирснээс зохиолч Ц.Буянзаяагийн "Улаагчин ингэж хэлсэн" роман,

-Хүүрнэл зохиолын богино хэмжээний бүтээлийн төрөлд 11 бүтээл ирснээс зохиолч, яруу найрагч О.Цэнд-Аюушийн "Хүйтэн тууж" ном,

-Баримтат уран зохиолын төрөлд 18 бүтээл ирснээс зохиолч Ш.Баатарын "Хайрхаан" ном, 

-Хүүхдийн зохиолын төрөлд 25 бүтээл ирснээс залуу уран бүтээлч Н.Батцэцэгийн "Н.Норовбанзад" зурагт ном, 

-Уран зохиолын орчуулгын төрөлд 1769 онд анх бичиж, Лондоны театрт тавьсан Александер Доүгийн "Чингис" эмгэнэлт жүжгийн орчуулгаар Хэл бичгийн ухааны доктор, соёл судлаач, орчуулагч М.Саруул-Эрдэнэ, 

-Утга зохиол, судлал, шүүмжийн төрөлд Зохиолч Ц.Буянзаяа "Монголын уран зохиолын түүхэн товч" 1, 2-р дэвтэр бүтээл, 

-Жүжиг киноны зохиол төрөлд залуу уран бүтээлч Э.Ган-Очир, Н.Майдар нарын "Дасгалжуулагч" киноны зохиол, 

-Шог хошин зохиолын төрөлд Зохиолч Д.Жаргалсайханы "Тусаан бурхан" ном тус тус шалгарчээ. 

---