Засгийн газрын хуралдаанаар Технологи дамжуулах төв, эсхүл хамтын оффист гишүүнчлэлээр бүртгүүлсэн гарааны компани болон программ хангамжийн үйлдвэрлэл, хөгжүүлэлтийн чиглэлээр үйл ажиллагаа явуулдаг аж ахуйн нэгжид дэмжлэг үзүүлэх журмыг баталсан байна. Энэ талаар БШУ-ны сайд Л.Энх-Амгалан мэдээлэл өгөв. 

БШУ-ны сайд Л.Энх-Амгалан:

-БШУЯ-наас гарааны компани болон технологи дамжуулах төв хамтын оффисын зохицуулалтыг шинэ шатанд гаргах шаардлагатай гэж үзсэн. Энэ асуудлаа Засгийн газрын хуралдаанд орж шийдвэрлүүллээ. Өнгөрсөн хугацаанд гарааны компанийг дэмжих үүднээс татварын олон хөнгөлөлтийг үзүүлж ирсэн. НӨАТ, аж ахуйн нэгжийн орлогын албан татвар, зарим тохиолдолд гаалийн татварыг хөнгөлж байна. Гэтэл судалгаанаас харахад гарааны компаниуд дараагийн шатанд гарч чадахгүй байгаа нь ажиглагдсан. Иймээс Технологи дамжуулах төв, эсхүл хамтын оффист гишүүнчлэлээр бүртгүүлсэн гарааны компани болон программ хангамжийн үйлдвэрлэл, хөгжүүлэлтийн чиглэлээр үйл ажиллагаа явуулдаг аж ахуйн нэгжид дэмжлэг үзүүлэх журмыг баталлаа.

Монгол Улсын эдийн засгийн шинэ сэргэлтийн бодлогыг тодорхойлохдоо шинжлэх ухаан, инновац, технологийн сэргэлтийг багтаасан. Энэ ондоо багтааж Алсын хараа бодлогын дараагийн шат болох 2030-2040 онд шинжлэх ухаан, инновац, технологийн сэргэлтийн бодлогыг боловсруулж танилцуулах чиглэлийг Засгийн газрын хуралдаанаас өглөө.

Дэлхий дээр манай улс эрдэм шинжилгээний ажилтны тоогоороо сүүл мушгиж байна. 3.3 сая иргэнтэй атлаа 1900 эрдэм шинэжилгээний ажилтантай байна. 1 сая иргэнд 540 эрдэм шинэжилгээний ажилтан ногдож байна. Манай улс ДНБ-ний 0001 хувийг эрдэм шинжилгээний ажилд зарцуулж байна. Гэтэл бусад улс орнууд хамгийн багадаа 2-3 хувийг зарцуулдаг. Иймээс энэ асуудалд анхаарал хандуулах шаардлага үүссэн. Бид жилд 400 тэрбум төгрөгийг шинжлэх ухаандаа зарцуулах шаардлагатай.

Сүүлийн гурван жилийн хугацаанд судалгаа нэртэй зарлагдсан тендерийн үнийн дүн 280 тэрбум байна гэсэн дүн гарсан. Энэ нь эрдэм шинжилгээ судалгааны ажилд зарцуулсан мөнгөнөөс 10 дахин их байгаа юм. Иймд технологи дамжуулах төв, эсхүл хамтын оффист гишүүнчлэлээр бүртгүүлсэн гарааны компани болон программ хангамжийн үйлдвэрлэл, хөгжүүлэлтийн чиглэлээр үйл ажиллагаа явуулдаг аж ахуйн нэгжид дэмжлэг үзүүлэх журмыг баталж байна.

Энэ журам батлагдсанаар инновацын төсөл хэрэгжүүлэгч иргэн, аж ахуй нэгж, эрдэм шинжилгээний байгууллага, программ хангамжийн үйлдвэрлэл, хөгжүүлэлтийн чиглэлээр үйл ажиллагаа явуулдаг аж ахуйн нэгжүүдэд адил тэгш боломжийг олгож, төслөө хэрэгжүүлэх тав хүртэлх жилийн хугацаанд Инновацын тухай хууль, Гаалийн болон Нэмэгдсэн өртгийн албан татварын тухай болон бусад хууль тогтоомжид заагдсан хөнгөлөлт, чөлөөлөлтийг эдэлнэ.

Мөн түүнчлэн, инновацын дэд бүтэц болох технологи дамжуулах төв, хамтын оффисын үйл ажиллагаа идэвхжиж, эрдэм шинжилгээ, үйл ажиллагааны үр дүнг эдийн засгийн эргэлтэд оруулах нөхцөл бүрдэн, мэдлэгт суурилсан эдийн засгийг хөгжүүлэхэд чухал хөшүүрэг болох юм гэв.

---