Мөсний загасчлалын Улсын аварга шалгаруулах тэмцээн (УАШТ) өнгөрсөн амралтын өдрүүдэд Архангай аймгийн Өгийнуур сумын Өгий нуурт амжилттай зохиогдож өндөрлөлөө. LiveTV.mn сайт тэмцээний хоёр өдрийн явцыг шууд дамжуулан үзүүлэв. 

Мөсний загаслалын Дэлхийн аварга шалгаруулах тэмцээн-2024 ирэх жил Өгий нуур дээр зохиогдох тул энэ удаагийн УАШТ олон улсын дүрмээр зохиогдсоноороо онцлог боллоо. 18 клубын 90 тамирчин 50х130м харьцаатай том талбай дээр ур чадвар, авхаалж самбаагаа сорилоо. 

Хоёр өдрийн нийлбэр дүнгээр "ICE TEAM MONGOLIA" буюу Мөсний загасчлалын улсын шигшээ багийн тамирчид аваргалж, алтан медалийн эзэд боллоо. Тэмцээний эхний өдөр шигшээ багийн тамирчин Н.Батбилэг гурван цагийн хугацаанд 21кг 878гр загас барьснаараа УАШТ-ий түүхэн дэх үнэмлэхүй амжилтын эзэн болов. Ташрамд сонирхуулахад, Монгол улсын шигшээ баг хоёрдугаар сарын 20-26-нд Эстони улсад зохиогдох Мөсний загасчлалын ДАШТ оролцоно. 

Мөсний загасчлалын УАШТ-ий хоёрдугаар байр буюу мөнгөн медалийг "Улаанбаатар" клуб, хүрэл медалийг "Алгана" клуб эзэллээ. 

Хувийн дүнгээр алтан медалийг "Хаан тул" клубын М.Баттулга, мөнгөн медалийг "Улаанбаатар" клубын Г.Золбоо, хүрэл медалийг "Ice Team Mongolia" клубын тамирчин Н.Чинбат шалгарлаа. "Хаан тул" клубын М.Баттулгын хувьд энэ тэмцээний хоёр дахь өдөр 2кг алгана барьж, "Том загас" шагналын эзэн боллоо. 

---