“Эрдэнэс Монгол” ХХК-ийн Нээлттэй болон нөөц бүрдүүлэх ажлын байрны сонгон шалгаруулалтын явцын талаар мэдээлж байна.

Нийт 19 хүний бүрэлдэхүүнтэй ажлын дэд хэсэг 2023 оны нэгдүгээр сарын 17-20-ны хооронд сонгон шалгаруулалтад бүртгүүлсэн иргэдийн материалыг нягтлан шалгажээ. Давхардсан тоогоор нийт 3544 хүн бүртгүүлсэн бол давхардаагүй тоогоор 2955 хүн бүртгүүлсэн байна.

Цаашлаад шаардлага хангасан 2407 хүн байгаа бөгөөд

• Ахлах менежерийн түвшинд 234
• Менежерийн тевшинд 345
• Гүйцэтгэх албан тушаалд 1828 хүн тус тус шаардлага хангасан байна.

Сонгон шалгаруулалт энэ сарын 26-27-нд Д.Нацагдоржийн нэрэмжит Улаанбаатар хотын төв номын санд болно. Нэг өдөрт тав, нийт арван удаа шалгалт авна. Шалгалт дууссан даруйд тухайн иргэнд шалгалтын оноог мэдээлэх бөгөөд сонгон шалгуулалтыг ил тод, нээлттэй явуулна гэлээ.

Баримт бичгийн шаардлага хангасан эсэх талаарх мэдээллийг e-tanhim.gov.mn сайтаар орж шалгаж болно.

Шалгалтад оролцох хүн тус бүрд шалгалтын зарыг илгээнэ. Шалгалтын агуулгын хувьд хувь хүний хөгжил, компанийн засаглал, Алсын хараа-2050 гэх мэт сэдвийг багтаажээ.

Шалгалтын нийт оноо 70, ярилцлагын асуулт 30 байна. Нэг ажлын байранд хамгийн өндөр оноо авсан горилогч ажилд орно хэмээн мэдэгдлээ. 

---