Эв нэгдлийн ажлын хэсгээс зохион байгуулж байгаа Ардчилсан намын Үндэсний бодлогын хорооны хурал үргэлжилж байна. Тус хурлаас өнөөдөр АН-ын шинэ даргыг сонгох юм. Намын даргад С.Баярцогт, Л.Гантөмөр, С.Одонтуяа, З.Нарантуяа нар өрсөлдөхөөр өчигдөр нэр дэвшигчийн үнэмлэхээ гардсан ч, өнөөдөр УИХ-ын гишүүн С.Одонтуяа нэрээ татаж, З.Нарантуяаг дэмжихээ илэрхийлэв.

АН-ын дарга болох магадлалтай хоёр нэр дэвшигчийн нэг, УИХ-ын гишүүн, сайд асан Л.Гантөмөрөөс дараах тодруулгыг авлаа. 

УИХ-ын гишүүн, сайд асан Л.Гантөмөр: 

-Бид яаж хамтрах тухайгаа ярьж байна. Удахгүй санал хураалт явагдана. 

Би намын дарга болбол сонгууль руугаа анхаарна. Сонгууль дөхөөд байна. Орон нутгаар явна. Эмч, багш нартайгаа уулзана. 

-Таныг сайдын суудлаас буунгуутаа хувийн сургуультай болсон гэсэн яриа гарсан? 

-Би хувийн сургуультай болоогүй. Сургуульд зөвлөх хийсэн. Сайдаас буусны дараа хунчир тарьж, Солонгост худалдаж байгаа гэв.

Энэ мөчид ҮБХ-ны хурал хэвлэлийнхэнд хаалттайгаар үргэлжилж байна. Хуралд оролцогч гишүүд намын даргад нэр дэвшигчдээс асуулт асууж хариулт авч байна. Дараа нь санал хураалт явагдаж, шинэ намын дарга тодорно. 

---