Хөгжлийн банкны зээлтэй холбоотой УИХ-ын нээлттэй сонсгол хоёр дахь өдрөө үргэлжилж байна. "Эрэл" группийн Хөгжлийн банкнаас авсан зээлийн зарцуулалт, үр дүнгийн талаар хэлэлцэх үеэр гүүрэн зээл/дамжуулан зээлтэй холбоотой асуудал гарах үеэр 2012-2014 оны Засгийн газрын шийдвэрээр /Ерөнхий сайдаар Н.Алтанхуяг ажиллаж байсан/ Хөгжлийн банкны Төлөөлөн удирдах зөвлөл /ТУЗ/-ийн даргаар эдийн засагч бус, хуульч хүнийг тавьсан нь илрэв. 

"Эрэл" групп нь Байшин үйлдвэрлэх комбинат /БҮК/-ыг барьж байгуулахын тулд Монгол улсын Хөгжлийн банкнаас гурван удаа буюу 14, 13.1, 9 сая ам.долларыг зээлж авсан ба сүүлийн хоёр буюу 13.1, 9 сая ам.долларыг ХБНГУ-ын банкнаас дамжуулан зээлж авсан /гүүрэн зээл/ байдаг аж. Энэ талаар УИХ-ын гишүүн Т.Доржханд "Европын банкнаас авсан хоёр зээлийг хэн төлөх вэ?" гэсэн асуултад, тухайн үед Хөгжлийн банкны ТУЗ-ийн даргаар ажиллаж байсан Б.Шинэбаатар: 

-БҮК хариуцна гэж ойлгож байгаа гэсэн хариулт өгөв. Дамжуулан авсан зээлийг Хөгжлийн банк 100 хувь хариуцах нь тодорхой болоод байгаа энэ үед дээрх асуултад гайхсан Т.Доржханд гишүүн, 

-Та эдийн засагч хүн мөн үү? Та ямар мэргэжилтэй вэ? Дамжуулан зээл гэдгээ та ойлгож байна уу? гэхэд Б.Шинэбаатар: 

-Би эдийн засгийн талаар ч "А" ч мэдлэг байхгүй. Би хуульч мэргэжилтэй хэмээн хариулав. 

Өөрөөр хэлбэл, одоогийн УИХ-ын гишүүн Н.Алтанхуяг 2012 онд Ерөнхий сайд болонгуутаа Хөгжлийн банкны солонгос удирдлагуудыг хөөж явуулаад, бүх эрх мэдлийг Засгийн газар дээрээ авахдаа эдийн засгийн "А" ч мэдлэггүй хүнийг ТУЗ-ийн даргаар тавьсан нь "Эрэл", "Бэрэн" хэмээн Хөгжлийн банкны томоохон, чанаргүй зээл үүсэх эх үндэс болжээ гэж дүгнэж болохоор байна. 

---