Монгол улсын цементийн 20 хувийг хангадаг "Цемент шохой" ТӨХК шинэ гүйцэтгэх захиралтай болоод жилийн нүүр үзэх гэж байна. Барилга, бүтээн байгуулалтын ид цагаар засварт орж, Монгол улсыг цементийн тасалдалд хүргэж, УБ-Дархан чиглэлийн автозамаас эхлээд томоохон бүтээн байгуулалт зогсонги байдалд оруулж байсан нь өнгөрсөн зуны үйл явдал. Үүнээс үүдэж, Монгол улсын Засгийн газраас 2022 оныг дуустал импортын цементийн татварыг тэглэж байв. 

Л.Наранбаатарыг эдийн засагч гэж нийгэм хардаггүй. З.Энхболд руу оймс шидэх, Ерөнхийлөгчийн сонгуулийн үеэр Х.Баттулгын луйврын схемийг илчлэх ажлаа сайн хийсэн тул түүнийг МАН-д гишүүнээр элсүүлж, улмаар энэхүү улсын стратегийн чухал үйлдвэрийн гүйцэтгэх захирал болгосон юм.

Уг нь Ковидын хуулийн үйлчлэл дууссан учир түүнийг чөлөөлөх ёстой. Түүнийг байлгаад байнаа гэдэг ирэх хавар эхлэх их бүтээн байгуулалтын ажил саатахгүй гэх баталгаагүй болсон гэсэн үг. Ажил ид өрнөх өнгөрсөн зуных шиг үеэр "Цемент шохой" засвартай суухгүй гэж баталгаагүй гэсэн үг. Тэр эдийн засагч гэхээсээ тэмцэгч болж нийгэмд танигдсан нэгэн шүү дээ. 

Тэрээр энэ үйлдвэрийг удирдаж эхэлснээс хойш ШӨХТГ-ын дарга асан С.Мөнхчулууны хамаарал бүхий компанитай харуул хамгаалалтын гэрээ байгуулсан, тендер зарлахгүйгээр "МН Жойн" компанитай "тэсэлгээ"-ний гэрээ байгуулсан зэрэг хэл аманд өртөөд байгаа. Ажил хийх гэж очсоныгоо ахуй амьдралаа өөд гэж ойлгоогүй л байлтай. 

Удирдлагын хэт хөөсөрсөн арга барилаас улбаалж сүүлийн үед мэргэжлийн ажилчид нь ажлаасаа гарч, "инженер, ажилтан авна" гэсэн зар үзэгдэх болсон нь дээрх таамгийг батална. Л.Наранбаатараас өмнө МАК, Монцемент зэрэг аж ахуйн нэгжүүд боловсон хүчнээ "Цемент шохой"-гоос авдаг байлаа шүү дээ. 

Уул шугамандаа, Л.Наранбаатараас өөр өөдтэй хүн байсан бол энэхүү үйлдвэрийг ядах юмгүй удирдана. Учир нь “Цемент Шохой” ТӨХК нь улсаас олон төрлийн татаас авдаг. Энэхүү давуу байдлаа ашиглан зах зээлд үнийн огцом савлагааг үүсгэж чаддаг. Эсрэгээрээ, давуу эрх нь үйлдвэрийн менежмент, түүхийн эд хомстох зэрэг нь асуудал дагуулдгийг өнгөрсөн зунжин монголчууд бид цементийн хомстлоор амссан шүү дээ. 

Л.Наранбаатартай "Цемент шохой" нар үзэхгүй л болов уу. Их бүтээн байгуулалтын ажил эхлэхээр яана даа хэдүүлээ! 

---