АН-ын Эв нэгдлийн хурлаас зохион байгуулж байгаа гэх АН-ын Үндэсний бодлогын хорооны хуралдаан өнөөдөр Туушин зочид буудалд эхэллээ. ҮБХ-наар намын дүрмийн өөрчлөлтийг хэлэлцэх бөгөөд намын шинэ дүрмийг баталсны дараа АН-ын даргыг сонгох сонгуулийг энэ сарын 17-нд зохион байгуулах юм байна. Энэхүү хурлыг С.Эрдэнэ даргатай АН зохион байгуулж байгаа ба О.Цогтгэрэл даргатай АН-ынхан энэхүү хурлыг "Хууль бус, хүчин төгөлдөр бус" хэмээн мэдэгдлээ. 

Сэлэнгэ аймгийн АН-ын дарга Р.Батжаргал: 

-С.Баярцогт манай Сэлэнгэ аймгаас сонгогдож байсан. Сонгогдох болохоор намын доод, дунд шатны хүмүүсийн үгийг сонсдог, намын дарга болохоороо сонсдоггүй байж болохгүй. Намын доод, дунд шатны гишүүд С.Баярцогтыг Ардчилсан намын дарга болохыг дэмжихгүй байна. МАН, ерөнхийлөгч У.Хүрэлсүхийн дэмжлэгтэйгээр С.Баярцогт АН-ын дарга болох гэж байна. АН-ын дүрэм хамаагүй, журам гаргаад даргаа сонгоод явна гэдгийг хүлээн зөвшөөрөх боломжгүй. 

АН-ын ЕНБД И.Мөнхжаргал: 

-Өнөөдөр хуралдаж байгаа ҮБХ-ны хурал бол АН-ын үйл ажиллагаа биш. Намын дарга ҮБХ-ны хурлыг хуралдуулах тогтоол гаргаагүй. ҮБХ-ны гишүүн бол жилийн 3 сая төгрөгийн татвар төлдөг. Гэтэл ҮБХ-ны гишүүн мөн нь мэдэгдэхгүй хүмүүс тэнд хуралдаж шийдвэр гаргах гээд байна. 

Харин АН энэ сарын 18-нд Их хурлаа хийж намын даргаа сонгоно. Дүрэмгүй тоглож байгаа улсад хариуцлага тооцно гэв. 

Ийнхүү хоёр сарын өмнө эвлэрэх ажлын хэсэг гарган, үүнийгээ "амжилттай явж байна" хэмээн ярьж байсан Ардчилсан намынхан дахин хагаралдаж эхэллээ. Энэ байдлаараа 2024 оны сонгуульд хуваагдаж орох бололтой. 

---