Архангай аймагт сураггүй болсон иргэнийг эсэн мэнд олжээ. Түүнийг Булган сум дахь Цагдаагийн хэсгийн мөрдөгчид хүлээлгэн өгсөн байна.

Архангай аймгийн Булган сумын Тамир багийн “Асгат” гэдэг газар /аймгийн төвөөс баруун зүгт 20 км-т, сумын төвөөс зүүн зүгт 15 км-т/ 4 хүн самар түүж явснаас иргэн У энэ сарын 8-ны өдрийн 17:00 цагийн орчим сураггүй болсон.

Алга болсон тухай дуудлагыг 9-ний өдрийн 01:15 цагт Онцгой байдлын албанд хүлээн авчээ. Тус аймгийн Онцгой байдлын газрын Эрэн хайх, аврах салбарын алба хаагчид, Булган сумын Засаг даргын Тамгын газрын ажилтнууд, ар гэрийнхэн иргэн У /25 настай, эрэгтэй/-ыг эрэн хайх ажиллагааг зохион байгуулж, 9-ний өдрийн 15:25 цагт Ихтамир сумын Хан-Өндөр багийн Их-Өлөнт гэдэг газарт төөрсөн явж байхад нь эсэн мэнд олжээ. Тодруулбал, сураггүй болсон газраас зүүн хойд зүгт 14 км-т, биеийн байдал хэвийн олджээ. Түүнийг Булган сум дахь Цагдаагийн хэсгийн мөрдөгчид хүлээлгэн өгсөн байна.

---