УБТЗ-ын Тээвэр зохион байгуулалтын албаны орлогч дарга С.Батдөлийн гэрээс 7,3 тэрбум төгрөг хураан авсан. Мөн үндэслэлгүйгээр 4 тэрбум төгрөгийн үл хөдлөх хөрөнгөтэй болсон гэх шалтгаанаар шалгаж байна гэж ХЗДХ-ийн Х.Нямбаатар мэдэгдлээ.

ХЗДХ-ийн сайд Х.Нямбаатар:

-Ерөнхий сайд Л.Оюун-Эрдэнэ шинээр томилогдох сайд нарыг УИХ-д танилцуулах үеэрээ "Төрд үүрлэсэн авлигачидтай тэмцэх ажил цаашид үргэлжилнэ. Хэт өндөр хэрэглээтэй орлогоо нотолж чадахгүй байгаа төрийн албан хаагчидтай тэмцэнэ.

Авлигаар хөрөнгөжсөн төрийн албан хаагчдыг зарлана. Ялангуяа газартай холбоотой асуудлыг ил болгон зарлаж, цахимжуулна. Төмөр зам, тээвэр логистиктой холбоотой салбарын дарга нар болгоомжтой байгаарай. Дараагийн бөмбөг тэсэрнэ шүү" хэмээн ярьсан.

Өнгөрсөн шөнө Эрүүгийн цагдаагийн албанаас хойшлуулшгүй ажиллагаа явуулж УБТЗ-ын Тээвэр зохион байгуулалтын албаны орлогч дарга С.Батдөлийн гэрээс болон түүний хамаарал бүхий этгээдүүдийн гэрээс нийт 7.3 тэрбум төгрөгийг хураан авсан. Түүнийг 48 цагийн хугацаатай цагдан хорьсон. Үүнээс гадна үндэслэлгүйгээр 4 тэрбум төгрөгийн үл хөдлөх хөрөнгөтэй болсон гэх шалтгаанаар шалгаж байна. Мөрдөн шалгах ажиллагаа үргэлжилж байна гэсэн юм. 

---