Ардчилсан намын үндэсний бодлогын хорооны дарга Д.Ганбат цаг үеийн асуудлаар мэдээлэл өгөв.

Ардчилсан намын үндэсний бодлогын хорооны дарга Д.Ганбат:

-Иргэдийн амьдрал хүнд хэцүү болж байна. Баялагтаа эзэн гэх монголчуудын баялгийг хэдэн хүн л эзэмшиж буйг залж залруулах ёстой. Үндсэн хуулийн нэмэлт өөрчлөлтийг хулгайгаар хийсэн. Дахиад ч хийх гэж байна. Гэсэн ч тогтолцооны өөрчлөлтийг нь дэмжиж ажиллах болно. Үүнийг өөрөө өөрсдөдөө зориулж батлахгүйгээр, 2024 оноос хэрэгжүүлж эхлэх нь зөв юм.

Үндсэн хуулийг баталж, багцалж зардаг, хууль бус зүйл хийдэг байдал хэрээс хэтэрч, УИХ нь УИХ биш, Засгийн газар нь Засгийн газар биш болсон. Давхар дээл өмссөн, яамнаасаа баян сайдуудыг төрүүлсэн нь ард түмний дургуйцлийг төрүүлж байна.

УИХ дахь АН-ын бүлгийг УИХ-д эрх баригчдыг хязгаарладаг сөрөг хүчин байхын төлөө миний бие ажилласан. Ганц дайчин ганцаардахгүй гэгчээр ажилласан. УИХ-ын Ардчилсан намын бүлгийг зургаан хүнтэй байсныг 12 хүнтэй болгож, бэхжүүллээ. Ардчилсан намын нэрээр сонгогдсон гишүүд эрх баригч намд үйлчилж байна.

Бид Үндэсний бодлогын хороогоо цэгцэлж, хууль журмын дагуу ажиллаж байсан ч хууль бусаар хэдэн нөхөд хуралдаж байгаа үйл явдал өчигдөр боллоо. Ковидын үед Дүнжингарав худалдааны төвийн гадаа олон хүн цуглуулж ҮБХ-г хуралдуулж байсан. Түүнээс болж олимпын аварга, начин хоёрыг муудалцуулах орон байраар хангасан хүн нь О.Цогтгэрэл гэж хүн. Ардчилсан намын ганц баатар хүнийг "Тэсо"-гийн хамгаалагч нар зоддог. О.Цогтгэрэл гэдэг хүн Ардчилсан намыг талцаж бутаргах үйл ажиллагааг байнга хийж байна. Орон даяар иргэдийн тархи угаалт явагдаж байна. Үүнд итгэх ёсгүй гэдгийг гишүүддээ хэлмээр байна. Бид ард түмэнтэйгээ нийлж хууль ёсоор сонгуульдаа оролцоно гэдгээ хэлмээр байна гэв. 

---