Эрүүл мэндийн сайд С.Энхболдын санаачилгаар НҮБ-ын Хүүхдийн сангийн дэмжлэгээр Монголын эрүүл мэндийн салбарын ирээдүйн удирдагчдыг бэлтгэх Харвардын Их Сургуулийн “Эрүүл Мэндийн Салбар дахь Манлайлал” сэдэвт Зүүн өмнөд Азийн бүсийн тэтгэлэгт хөтөлбөрт хамруулах сонгон шалгаруулалтыг эхлүүлжээ.

Тус хөтөлбөрийн хүрээнд таван жилийн туршид Монгол Улсын Эрүүл мэндийн салбарт 100 залуу манлайлагч бэлтгэх бөгөөд 2023-2024 онд эхний 20 манлайлагч бэлтгэнэ. Энэхүү хөтөлбөрийн хүрээнд дараах мэдлэг, ур чадварыг эзэмшүүлнэ. 

Үүнд:
- Стратегийн удирдлага;
- Эмнэлгийн бүтэц, зохион байгуулалт;
- Санхүүгийн удирдлага болон тооцоолол;
- Эрүүл мэндийн салбарын хүний нөөцийн удирдлага;
- Эмнэлгийн мэдээлэл технологи;
- Эмнэлгийн тусламжийн чанар, аюулгүй байдал;
- Төсөл бичих (project proposal)

Дээрх хөтөлбөр нь 2023 оны хоёрдугаар сарын 27-ны өдөр эхлэн 1 жилийн хугацаанд цахим хэлбэрээр явагдах ба сургалтын хугацаанд суралцагч 3 удаагийн семинарт биечлэн оролцоно.

Семинар 1: 2023 оны 2-р сарын 27-оос 3-р сарын 2-ны өдрүүдэд Малайз Улсын Селангор хотод
Семинар 2: 2023 оны 9-р сарын 11-14-ний өдрүүдэд Малайз Улсын Селангор хотод
Семинар 3: 2024 оны 2-р сарын 26-29-ний өдрүүдэд Америкийн Нэгдсэн Улсын Бостон хотод

Мөн НҮБ-ын Хүүхдийн сангаас болон бусад байгууллагаас  нэмэлтээр эх , хүүхдийн эрүүл мэндийн чиглэлээр болон манлайллын чиглэлээр  хичээлүүд нэмэлтээр заагдана.

Хөтөлбөрт тавигдах шаардлага:

- 45-аас доош насны
- Эрүүл мэндийн чиглэлийн мэргэжилтэй байх
- Англи хэлний ахисан шатны мэдлэгтэй байх

Бүрдүүлэх материал: Бүх материалыг англи хэл дээр бүрдүүлэх

- CV
- Анкет
- Диплом
- Эссэ /Хөтөлбөрт хамрагдах хүсэлт бүхий 250-500 үгтэй эссэ /
- Одоогийн болон урьдах аль нэг удирдлагын тодорхойлон дэмжсэн захидал (reference letter)

Сонгон шалгаруулалт 2 үе шаттай явагдана.
1-р үе шат: 2023 оны 1 дүгээр сарын 04-08-ны өдрүүдэд бүртгэл явагдана. /шаардлага хангасан хүмүүс бүрдүүлэх материалын албажуулан pdf-ын нэг файл болгон өөрийн овог нэрээр хадгалан orgil.b@moh.gov.mn имэйл хаягт ирүүлнэ үү. (утас 88116124)
2-р үе шат: 1-р үе шатад тэнцсэн оролцогчдтой англи хэл дээр ярилцлага хийх болно. Ярилцлага хийх өдрийг бүртгэл дээрх цахим хаягаар мэдэгдэх болно.
 
Сонгон шалгаруулалтад тэнцсэн 20 оролцогчдод сургалтын төлбөр (15,900 ам.доллар) тэтгэлэг олгоно.
Харвард лүү шууд бөглөхгүй ЭМЯ-аар дамжуулж бүртгүүлэх  болохыг анхаарна уу.

---