Автобусны жолооч кабиндаа газ асааж өөрийгөө дулаацуулж байна гэх агуулгатай дүрс бүхий бичлэг цахим орчинд цацагдсан. Үүссэн нөхцөл байдлыг "Зорчигч тээвэр гурав" ОНӨАТҮГ-ын инженер Ц.Мөнхбаатараас тодрууллаа.

"Зорчигч тээвэр гурав" ОНӨАТҮГ-ын инженер Ц.Мөнхбаатар:

-Тухайн автобус нь 2009 онд үйлдвэрлэгдсэн. Өчигдөр 19 цагийн үед уг автобусны жолооч байгууллагын ээлжийн инженер лүү ярьж, "Хийн системд хөлдөлт үүссэн, конс ажиллахгүй байгаа" талаар хэлсэн.

Дуудлагын дагуу техникийн түргэн тусламж гарсан. Түргэн тусламж очих хугацаанд жолооч замаа чөлөөлж зогсох зорилгоор автобусаа асаахаар буруу ажиллагаа хийсэн байна. Хөлдөлт өгөөд хий алдаж байсан тоормосны аппарат, консны дээд аппарат руу газ асааж бүлээсгэх гэсэн байна лээ. Олон жил болсон автобусанд доголдол их гардаг. Тэрнээс биш автобус дотроо гал түлж, дулаацаагүй. Жолооч түгжрэл үүсгэхгүйн тулд автобусаа хөдөлгөхөөр анхан шатны арга хэмжээ авсан л үйл явдал болсон.

Одоогоос 10 жилийн өмнө төмөр утасны үзүүрт түлш асгасан даавуу уяад гал асааж, хөлдөлтийг гаргадаг байсан. Өвлийн улиралд хийн системтэй автобусанд хүндрэл их гардаг.

Манайд 2009 онд үйлдвэрлэгдсэн 30 автобус байдаг. Үүнээс иргэдэд үйлчлэх боломжтой аюулгүй гэж үзсэн 12 автобус л үйлчилгээнд явж байна. Эдгээр нийтийн тээвэр 14 жил явсан, бараг нэг сая км явсан байна. Хуучирсан учраас дотор нь паар ажиллуулсан ч хүйтэн байдаг гэлээ. 

---