Хууль зүй, дотоод хэргийн яам болон БНХАУ-ын Боомтын асуудал хариуцсан агентлаг өнөөдөр цахимаар хуралдсан талаар ХЗДХ-ийн сайд Х.Нямбаатар мэдээлэл хийлээ. 

Өмнөд хөршийн Онцгой комиссын 144 дүгээр шийдвэрээр 2023 оны нэгдүгээр сарын 8-наас БНХАУ бүх боомтоо нээхээр шийдвэрлэсэн. Энэ хүрээнд Монгол улсын ГХЯ Эрээн зэрэг боомтыг мөн хугацаанд нээх хүсэлтийг бичгээр өргөн барьсан ч БНХАУ-ын талаас хариу ирүүлээгүй байсан юм.

Харин энэ удаагийн цахим уулзалтаар хоёр талаас бэлтгэл хангагдмагц Эрээн-Замын-Үүдийн боомтын зорчигч тээврийн хөдөлгөөнийг хамгийн түрүүнд нээхээр тохиролцжээ. ХЗДХ-ийн сайд Х.Нямбаатарын найдаж буйгаар "Эрээний боомт 1 сарын 8-нд нээгдэхгүй байж магадгүй. Гэхдээ 2023 оны нэгдүгээр сардаа багтаад нээгдэх байх гэсэн хүлээлттэй байна" гэсэн юм. 

Эрээн-Замын-Үүдээс эхлэн Шивээнхүрэн-Сэхэ, Ханги-Мандал, Бичигт гэх мэт дарааллаар нээхээр хоёр тал тохиролцжээ.

---