Улсын Их Хурлын Тамгын газраас нийт ажилтнууддаа зориулсан Зөвлөлдөх санал асуулгын талаарх мэдээлэл, чиглэл өгөх сургалт зохион байгуулав.

Улсын Их Хурлын 2022 оны 80 дугаар тогтоолоор улс орны нийгэм, эдийн засгийн тулгамдсан асуудлыг иргэдийн туслалцаатайгаар тодорхойлох, асуудлын эрэмбэ, шийдвэрлэх арга зам, гаргах шийдвэрийн талаар иргэдтэй зөвлөлдөх, үндэсний зөвшилцлийг хангах зорилгоор “Зөвлөлдөж шийдье” зөвлөлдөх санал асуулга зохион байгуулахаар шийдвэрлэсэн.Үүнтэй холбогдуулан Улсын Их Хурлын Тамгын газраас нийт ажилтнууддаа зориулсан Зөвлөлдөх санал асуулгын талаарх мэдээлэл, чиглэл өгөх сургалт зохион байгуулав.  

Улсын Их Хурлын Ерөнхий нарийн бичгийн дарга Л.Өлзийсайхан Зөвлөлдөх санал асуулгын зорилго, ач холбогдол, санал асуулгаар юуг, хэрхэн авч үзэж, шийдвэр гаргах талаарх үндсэн ойлголтыг танилцуулаад, Улсын Их Хурлын 80 дугаар тогтоолыг хэрэгжүүлэх хүрээнд мэдээлэл өгөв.

Улсын Их Хурлын Тамгын газрын Хууль эрх зүйн газрын дарга Г.Агар-Эрдэнэ Төрийн байгуулалтын байнгын хорооны тогтоолоор байгуулагдсан зөвлөлдөх санал асуулга зохион байгуулахад туслалцаа үзүүлэх үүрэг бүхий Ажлын хэсгийн үйл ажиллагаа болон хийх ажлын ерөнхий төлөвлөлтийн талаар мэдээлэл хуваалцав.

Сургалтын үр дүнд Улсын Их Хурлын Тамгын газрын ажилтнууд Зөвлөлдөх санал асуулга явуулахад туслалцаа үзүүлэх чиг үүргийнхээ хүрээнд санал асуулгаар зохион байгуулах арга хэмжээний ерөнхий төлөвлөлт, зохион байгуулалт, анхаарах асуудлуудын талаар мэдлэг, мэдээллээ нэмэгдүүлжээ. 

---