Монгол банкны Ерөнхийлөгч Н.Баяртсайханы урилгаар МУГТ Б.Гангаамаа “Ертөнцийн гурав дахь туйл” сэдвээр Монгол банкны ажилтнуудад өнөөдөр лекц хийв. Тэрбээр сүүлийн 10 жилийн хугацаанд дэлхийн болон Монгол орны уул хайрханд хийсэн авиралтууд, монголын болон дэлхийн уулын спортын хөгжил, түүхэн замналын талаар дэлгэрэнгүй танилцуулж хүмүүсийн сонирхсон асуултанд хариулав.

 

 

Лекцэнд оролцсон хүмүүс түүнээс “Ууланд анх хэрхэн хөл тавьсан бэ, хэн энэ спортод анх хөтөлж оруулсан, уулын спортоор хичээллэхэд бусад спортоос ямар давуу талтай байдаг, хэр их өртөг зардалтай байдаг вэ” гэх зэргээр асуулт тавьж, хариулт авчээ.

 

 

Б.Гангаамаа “Ертөнцийн гурав дахь туйл” сэдэвт сонирхолтой лекцийг анх 2008 онд Эрдэнэт хотын Уурхайчдын соёлын ордонд тавьж байсан гэнэ. Энэ үеэс эхлэн Улаанбаатар хотод олон байгууллага хамт олны хүртээл болгосон байна. Б.Гангаамаа энэ удаагийн лекцдээ дэлхийн түвшинд үнэлэгдэх өөрийн сүүлийн үеийн томоохон авиралтуудын талаар тусгасан нь оролцогчдын сонирхлыг ихэд татжээ.

 

 

---