Сүхбаатарын талбайд жагсаж буй иргэдээс Нийслэлийн Засаг даргад ирүүлсэн хүсэлтийн дагуу хоёр гэр болон бусад шаардлагатай зүйлсийг олгохоор болжээ

Тодруулбал, өчигдөр буюу 2022 оны арванхоёрдугаар сарын 14-ний өдрийн 17:00 цагт ирүүлсэн өргөдөлдөө иргэд дулаалга, халаалттай 10 гэр, галын хор, сайн чанарын цахилгааны утас, ширээ сандал, сувгийн антен татаж өгөхийг шаардсан юм.  

Нийслэлийн Засаг даргын тамгын газрын Төрийн захиргаа, удирдлагын хэлтсийн дарга Ү.Ганболд өнөөдөр жагсагчдын төлөөллийг хүлээн авч уулзаж, иргэдийн эрүүл мэнд, аюулгүй байдлыг хангах үүднээс дулаалгатай гэр хоёрыг, мөн  галын хор, кабелийн утас,  ширээ, сандал, зурагт зэрэг шаардлагатай зүйлсийг олгох, түүнчлэн ДДЭШ сувгийн антенн холбуулж өгөх шийдвэр гаргасныг мэдэгдлээ. Мөн цаашид жагсаалд оролцож байгаа иргэдийн аюулгүй байдлыг хангахаар шаардлагатай арга хэмжээг нийслэлийн зүгээс шат дараатай авна. Ирүүлсэн хүсэлтийг боломж бололцоогоороо шийдээд явна. Харин цахилгааны болон галын аюулгүй байдлыг хангахад анхаарч, энэ чиглэлээр өгөх зааварчилгааг дагахыг хүссэн юм.

 

---