Улс төр, нийгмийн хүрээнд үүсээд буй нүүрсний хулгайн асуудалд Ерөнхий сайд Л.Оюун-Эрдэнэ, ХЗДХ-ийн сайд Х.Нямбаатар нар УИХ-ын гишүүн асан З.Энхболдын хамаарал бүхий "Страто", "Хишиг арвин индустрал" ХХК-ийг холбон, тодорхой мэдээллүүдийг өгч байсан билээ. 

Тодруулбал, ХЗДХ-ийн сайд Х.Нямбаатар "Хишиг арвин индустрал" ХХК, УИХ-ын дарга асан Зандаахүүгийн Энхболдын хамаарал бүхий "Страто" ХХК-ийн хүмүүс жагсаалд нөлөөлөх гэж оролдож байгаа баримт шалгагдаж байна.

З.Энхболдын хувьд "Хишиг арвин индустрал" ХХК-тай маш их хамааралтай хүн шүү" хэмээн тав хоногийн өмнө нүүрсний хулгайн хэргийг мөрдөн шалгах ажлын хэсгийн өдөр бүрийн 11:00 цагийн мэдээллээрээ хэлж байлаа.

Тэгвэл өнөөдөр нүүрсний борлуулалт, олборлолт, тээвэрлэлтэд шууд болон шууд бусаар холбогдсон 17 хүний нэрийг АТГ-аас зарласны дотор Монгол улсын ЕТГ-ын дарга асан З.Энхболд байв. 

Тухайн мэдээллийн мөрөөр УИХ-ын гишүүн асан З.Энхболдоос тодруулахад "МАН-ын тооцсоноор 6 сая тонн нүүрсний хулгай гарчээ. Ардчилсан намын ард түмэндээ үлдээсэн 6.4 тэрбум тонн нүүрсний нэг хувьд хүрэхгүй. Энэ хулгайд би ямар ч хамаагүй.

Хулгайч нарыг хурдан олоход Монгол ардын нам, Засгийн газар, Улсын их хурал, Ерөнхийлөгч У.Хүрэлсүх нарт амжилт хүссэн. Нүүрсний хулгай 2016-2022 онд үйлдэгдсэн" хэмээн өөрийн байр сууриа илэрхийлэв. 

---