Засгийн газраас орон нутгийн "Тавантолгой" ХК-д зургаан сарын хугацаатай онцгой дэглэм тогтоож, ХЗДХЯ-ны Төрийн нарийн бичгийн дарга П.Сайнзоригийг бүрэн эрхт төлөөлөгч /БЭТ/-өөр томилсон. БЭТ-ийн ажлыг хүлээлцүүлэхээр өнгөрсөн баасан гарагт Шадар сайд М.Амарсайханаар төлөөлүүлсэн ажлын хэсэг Өмнөговь аймагт ажилласан билээ. Шадар сайд орон нутагт ажилласан ажлынхаа талаар мэдээлэл өглөө.

Шадар сайд М.Амарсайхан: 

-Засгийн газрын 450 дугаар тогтоолын дагуу Өмнөговь аймгийн Цогтцэций суманд ажиллаад ирлээ. БЭТ-ийг ажилд нь оруулж, компанийн удирдлагыг бүрэн хэмжээнд хяналтад авч, цаашид хийх ажлын талаар газар дээр нь дүгнэлт хийсэн. Засгийн газарт хэд хэдэн чиглэлээр арга хэмжээ авч ажиллах дүгнэлтийг орууллаа.

Нэгдүгээрт, тэсэлгээний ажил, уулын олборлолт, холбогдох уулын ажлын төлөвлөгөөнүүдийг харж, үнэхээр тэр мөргөцгийн асуудал үнэн бодитой эсэхийг хөндлөнгийн экспертээр хянуулах,

Хоёрдугаарт, нүүрс шатсан /340 мянган тонн/ гэх асуудлыг мөн хөндлөнгийн экспертээр хянуулах,

Гуравдугаарт, БНХАУ бүх гэрээгээ бүртгэдэг. Гэрээний дугаар чухал. Манай улсын гаалийн мэдээ бүртгэл зөрдөг асуудлыг шалгахын тулд БНХАУ-аас гэрээ татаж авч тулгах ажил хийнэ. 

Энэ бүхэн тодорхой болсноор олон нийтийн эргэлзээг тайлж, төрийн өмчийг үнэгүйдүүлсэн эзэн холбогдогч тодорхой болно. 

Тавантолгойн нүүрсний бүлэг ордын /58 мянган га газар/ 95,5 хувьд нь "Эрдэнэс Тавантолгой" ХК үйл ажиллагаа явуулдаг бол орон нутгийн "Тавантолгой" ХК үлдэх 0,4 хувь буюу 260га газарт үйл ажиллагаа явуулдаг. Төрийн өмчийн газар дээр орон нутгийн өмчит компани үйл ажиллагаа явуулдаг. Орц гарц нь ч нэг байдаг тул хэнийх нь нүүрс ямар гарцаар гарч байгааг хянах хэрэгтэй. Орон нутгийн өмчийн компанийн нүүрсний чанар сорьц доогуур байдаг бол "Эрдэнэс Тавантолй" ХК-ийн сорьц өндөр байдаг. Энэ бүгдийг нягталж богино хугацаанд шийдэл гаргах хэрэгтэй гэв. 

---