Экваторын Гвинейн Бүгд Найрамдах Улсын Ерөнхийлөгч Теодоро Обианг Нгема Мбасого өнгөрсөн долоо хоногт болсон сонгуульд ялалт байгуулж, зургаа дахь удаагаа улиран сонгогджээ.

1979 онд цэргийн эргэлт хийж, засгийн эрхийг гартаа оруулсан Теодоро Обианг нь дэлхийн хамгийн урт хугацаанд төрийн эрх барьсан төрийн тэргүүн юм. Өдгөө 80 настай тэрээр энэ удаагийн сонгуулиар бараг 95 хувийн санал авсан гэж албаныхан санал хураалтаас зургаа хоногийн дараа албан ёсоор мэдэгджээ.

Түүний хүү бөгөөд тус улсын Дэд ерөнхийлөгч Теодоро Нгема Обианг Мангу "Бидний зөв гэдгийг сонгуулийн үр дүн дахин нотоллоо. Бид сүр хүчтэй нам хэвээр байна" хэмээсэн байна.

Нийт 15 намаас бүрдсэн эвслийн дэмжлэгтэй нэр дэвшсэн Теодоро Обиангийн эсрэг сөрөг хүчний хэд хэдэн нэр дэвшигч өрсөлдсөн ч тэдний хэн нь ч ялалт байгуулахгүй нь тодорхой байсан. Газрын тосоор баялаг Төв Африкийн улсыг бүрэн хяналтын дор удирддаг Ерөнхийлөгч Обианг улс төрийн сөрөг хүчнийг бараг бүхэлд нь нухчин дарж, чөлөөт хэвлэлийг хязгаарлан, Засгийн газрынхаа гол байр сууриудад гэр бүлийн гишүүдээ томилсон аж.

Эх сурвалж: BBC, Africanews

---