Энэ долоо хоногт нефтийн үнэ 8 хувиар буурч, 95 ам.доллараас 87 ам.доллар болсон хэдий ч Унгар, Монгол хоёр улсад түлш, шатахуун хомстож, үнэ нь өсөөд байна. Тус хоёр улс ОХУ гэсэн ганцхан эх үүсвэрэй учир ийм зовлон амсах хувь ерөөлтэй байжээ. 

Энэ сарын 21-ний даваа гаргийн байдлаар Унгарын нийт 28 хотын захиргаа шатахуунгүй болох эрсдэлтэй нүүр тулсан ба 75 жилийн аварга түүхтэй Унгарын MOL групп мөн өдрөөс эхлэн 250 ШТС-аа шатахуунаар хангаж чадахгүй хэмээн мэдэгджээ. Шатахууны үнэ литр тутамдаа 1.18 евро болж өссөн гэж албаныхан мэдэгдэж байгаа боловч, зах зээл дээр үүнээс ч үнэтэй байна. 

Монгол улс ч шатахууны хараат бус байдлыг олон жилийн туршид амсаж байна. Орос цоргоо нарийсгахад үнэ өсөж, бүсээ чангалахаас өөр аргагүй болох ба өөр эх үүсвэрийн талаар эрэлхийлдэг ч энэ нь өнөөдөө мөрөөдөл хэвээр байгаа.  

Сар орчмын өмнөөс эхэлсэн түлшний хомстол хэзээ дуусахыг Уул уурхай, хүнд үйлдвэрийн сайд Ж.Ганбаатар хэлж мэдэхгүй байна. "Нийлүүлэлт удахгүй хэвийн болно" гэж монголын сайд амлаж байгаа бол Унгарын албаны хүмүүс "Түр зуурын нөхцөл байдал" хэмээн ард түмнээ тайвшруулж байна. 

"Баяраа өөрөө ширээн дээрээс унасан" гэдэг шиг Монгол, Унгар хоёр улсын зовлон өнөөдөр эхэлчихээгүй.  

Украины дайнтай холбоотойгоор байгалийн хий, газрын тосны үнэ хэсэг хугацаанд нэмэгдсэн ч улс орнууд хараат байдлаасаа салж, өөр эх үүсвэрээс авч эхэлснээр нефтийн үнэ дэлхийн даяар буураад байна. Харин Монгол, Унгар хоёр хараат байдлаа хадгалан үлдсэнээр өнөөдөр түлшний хомстолд өртөж, экспортоо тасалдуулах эрсдэлтэй нүүр тулжээ. 

Унгарын Засгийн газар энэ хүндрэлээсээ хэрхэн гарахаар төлөвлөж байгааг таамаглахад эрт байна. Харин Монгол улсын Засгийн газын хувьд түлш, шатахууны ганцхан эх үүсвэртэйгээ ийн явсаар байх ахул үнэ өсөх, хомстолд орох эрсдэл үргэлж байсаар байх нь хэнд ч ойлгомжтой боллоо. Иймд стратегийн бүтээгдэхүүн гэдэг хуйвалдааны нэр томъёоноос татгалзаж, чөлөөт зах зээлийн хуулиар хэн хүссэн нь аль ч улс орны эх үүсвэрээс ханган нийлүүлдэг тогтолцоо руу шилжиж гэмээнэ үнэ хямдарч, улс иргэнээрээ хожих хуультай. 

Эс бөгөөс Монгол, Унгар хоёр улсын зовлон мөнхөд үргэлжилсээр байх болно. 

---