Ардчилсан шинэ үндсэн хуулийн дагуу байгуулагдсан УИХ-ын анхны гишүүдэд УИХ-ын дарга Г.Занданшатар хүндэтгэл үзүүллээ. 1992-1996 онуудад УИХ-ын дэд дарга асан Ж.Гомбожав гуайтай хэсэг хором ярилцлаа.

УИХ-ын дэд дарга асан Ж.Гомбожав:

- 1992-1996 оны УИХ нь Монгол орон хүний эрх, эрх чөлөөг дээдэлсэн ардчилсан тогтолцоо, зах зээлийн эдийн засгийн харилцаанд шилжих үеийн суурь хуулиуд болон бодлогын баримт бичгүүдийг батлан гаргаж, эх орондоо олон улсын жишигт нийцсэн байнгын ажиллагаатай парламентын тогтолцооны үндэс суурийг тавихад онцгой үүрэг гүйцэтгэсэн, түүхэн гавьяатай юм.

Анхны парламент нь шинэ Үндсэн хуулийн дагуу Монгол Улсад эрх зүйн шинэчлэл хийх, эдийн засгийн уналтыг зогсоож хөгжлийн суурийг тавих, гадаад харилцааг шинэ шатанд гаргах зэрэг хэд хэдэн томоохон зорилтыг дэвшүүлэн ажиллаж, түүндээ хүрч чадсан. Түүнчлэн Улсын Их Хурал, Засгийн газар бүрэн бүрэлдэхүүнээрээ дөрвөн жил тогтвортой ажилласан туйлын чадварлаг хамт олон байсан гэлээ.

Монгол Улсын ардчилсан, шинэ Үндсэн хуулийн дагуу байгуулагдсан анхны УИХ-ын 30 жилийн ойг тохиолдуулан УИХ-ын дарга Г.Занданшатарын санаачилгаар УИХ, Тамгын газраас 1992-1996 оны парламентад сонгогдон ажиллаж байсан гишүүд болон тэдний ар гэрийнхнийг хүлээн авч, хүндэтгэл үзүүлсэн юм.

.

---