Эрээн хотын Шуурхай штабаас 2022 оны 11 дүгээр сарын 22-ны өдрийн 73 тоот мэдэгдлээр, КОВИД-19-ийн 1 тохиолдол илэрсэнтэй холбогдуулан 11 дүгээр сарын 23-25-ны өдрүүдэд хотын хөдөлгөөнийг хорьж, өдөр бүр PCR шинжилгээ авахаар шийдвэрлэжээ.

Энэ сарын 23-ны өдрийн 11 цагийн байдлаар КОВИД-19-ын халдварын эерэг тохиолдол 3 болж, хотын 9 хэсгийг өндөр эрсдэлтэй бүсээр зарлаад байна.

11 дүгээр сарын 23-25-ны өдрүүдэд хотын иргэдийг PCR шинжилгээ өгөөд шууд гэртээ харих, зайлшгүй шаардлагаас бусад тохиолдолд гэрээс гарахгүй байхыг зөвлөжээ. Харин зайлшгүй шаардлагаар хотоос гарах тохиолдолд 48 цагийн 2 удаагийн шинжилгээний сөрөг хариу, харьяа дүүрэг болон шуурхай штабын зөвшөөрөлтэй байхыг шаардаж байгаа аж.

Мөн цэцэрлэг, сургуулийг үргэлжлүүлэн онлайнаар хичээллүүлэхээр шийдвэрлэж, хотын хүнс, өргөн хэрэглээний бүтээгдэхүүний нөөц хангалттай, онцгой байдлын үеийн ажил хэвийн явагдаж байгаа талаар мэдэгдлээ.

Улс хоорондын ачаа тээвэр хэвийн явж байгаа бөгөөд тус өдөр 84 машинд 89 чингэлэг, 45 импортын тээврийн хэрэгсэл улсын хилээр нэвтрүүлнэ гэсэн урьчилсан мэдээ гарчээ. 

---