Ард түмний хурлыг Төрийн ордонд хуралдуулах шаардлагын талаар тус ажлыг зохион байгуулах Ерөнхий зөвлөлийн гишүүд өнөөдөр мэдээлэл өгч, хэвлэлийн бага хурал хийлээ. 

Иргэн И.Цэвээн:

-Ард түмний хурал нь үндэсний хэмжээний том ажил тул зохицуулах зөвлөлийн хэдхэн гишүүдийн үүрэг хариуцлага гэхээс илүүтэй 21 аймаг, 330 сум, 9 дүүргийн 152 хорооноос сайн дураараа сонгогдсон иргэдийн төлөөлөл юм.

Ард түмний хурал хуралдуулах Ерөнхий зөвлөл 21 аймаг, 9 дүүрэгт салбар зөвлөлүүдээ байгуулж эхэлсэн. Тухайлбал, Дорнод, Хэнтий, Сэлэнгэ, Архангай, Төв, Дархан-Уул аймгуудад салбар зөвлөлүүд байгуулагдсан гэв. 

Ард түмнийг хуралдуулах Ерөнхий зөвлөлийн Төв аймаг дахь салбарын гишүүн н.Чинбаатар

-Ард түмний хурал хуралдуулах Үндэсний зөвлөлийн гишүүд өнгөрсөн хугацаанд ОУ-ын болоод НҮБ-ын хүний эрхийн баримт, хуулийн дагуу үйл ажиллагаагаа явуулж ирсэн. Гэвч төр болон иргэд хамтран зохион байгуулах ажилд учир дутагдалтай хандсан учир өнөөдрийг хүртэл зохион байгуулагдаагүй байна.

Үндэсний эрх чөлөө, тусгаар тогтнолын төлөө эрхээ эдэлж буй иргэд үүнийг зохион байгуулахад хяналтаа тавьж, хүсэл эрмэлзлээ илэрхийлэх зайлшгүй шаардлагатай гэлээ.

-Бид монголын төр, монгол хүний эрх ашгийг дээдлэн ардчилсан хагас жарныг шүүн хэлэлцэж, алдаа гажуудлыг засан тохинуулах, монгол улсын тусгаар тогтнол, бүрэн эрхт байдлыг бататган бэхжүүлж, хүчирхэг төртэй монгол улсыг ирээдүй хойчдоо хүлээлгэн өгөх зорилготой юм. Үүнээс өмнө төрд хяналт тавих ямар боломж байна, хууль, эрх зүйн гаргалгааг Ард түмний хурлаараа хэлэлцэж, төрдөө шаардлагаа хүргүүлэх юм гэлээ. 

---