"Сэрүүн Сэлбэ" төслийн удирдагчаар томилогдсон Бямба овогтой Цэцэгийн талаар бид юу мэдэх билээ?

Өөрийгөө инфлүүнсер хэмээн бодож, шуугиант үйл явдал бүр дээр шахам байр сууриа илэрхийлж байгаа харагддаг. "Хадаг" уран сайхны кинонд тоглож байсан...

Гэтэл сэтгүүлч Золзаяагийн "Мэдлэггүй мал шиг хүмүүсээр өөрийгөө тойруулаад, мэдлэгтэй хүмүүсийг дайсан мэт үзсэнээрээ Хотын дарга та Улаанбаатар хотын иргэдийг амьдралын чанарыг шууд доройтуулж байна", кино найруулагч Д.Золбаярын "Энэ Цэцэгээ гэдэг хүүхэн мэргэжлийн жүжигчин биш шүү. 2006 онд бүтээгдсэн "Хадаг" гэдэг арт кинонд жаахан охин тоглож байсныг нь мэдэх юм", Хуульч О.Батхүүгийн "Дух Цэцэгт ямар шалгуураар хэдэн тэрбум төгрөгийн төсөл өгснөө татвар төлөгч бидэнд тайлагнахыг хүсье. Их Тэнгэрт хүлээн авалтанд очсоныг нь мэднэ, дарга нарыг зогсоо зайгүй долоодог болсныг нь мэднэ. Бусдыг нь мэдэхгүй болохоор асууж байгаа юм" гэх үгс юуг илэрхийлнэ вэ? 

Товчхондоо, олон нийт мэргэжлийн бус хүнийг Сэлбэ голын төслийн удирдагчаар тавьсанд сэтгэл дундуур байна. Хотын дарга Д.Сумъяабазарыг энэхүү шийдвэрээ эргэн харна гэж найдаж хүлээж байна. 

"Сэрүүн Сэлбэ" төсөл дээр сонгон шалгаруулалт зарласан ба тэрхүү сонгон шалгаруулалтад Б.Цэцэг хэмээн тэрхүү бүсгүй шалгарчээ гэж олон нийт ойлгосон. Гэтэл Б.Цэцэг нь энэ талаар зөрүүтэй зүйлийг хэвлэлээр ярьсан байх юм. 

Нэг болохоор, "Хууль, дүрмийнхээ дагуу сонгон шалгаруулалт зарлагдсан. Сонгон шалгаруулалтад тэнцээд орж ирсэн" гэж ярих мөртлөө, нөгөө болохоор "Анх санал тавихад би аймар гайхсан. Пүү! гэж бодсон" гэх. 

Нийслэлийн Засаг дарга Д.Сумъяабазар та сонгон шалгаруулалт зарласан нэр зүүгээд, Б.Цэцэгт төслийн удирдагч болгох санал тавьж, шоконд оруулсан юм биш үү. Мэргэжлийн бус Б.Цэцэг нь өөртөө ч итгэхгүй "Пүү!" гэж бодсон байна шүү дээ. 

Хамгийн ноцтой нэг зүйл нь Б.Цэцэг ярилцлагадаа "Тавдугаар сараас хойш гарч байгаа бүх зардал цэвэр миний данснаас гарч байгаа" гэж ярьсан байх юм. 

Монгол төрийн ажил хувь хүний данснаас санхүүжиж явдаг болсон юм уу?! Өөрийн халааснаас гаргасан мөнгөө төрийн данснаас хэд нугалж авна гэж хожим шүүхдэх болж байна уу? Эсвэл, хотын дарга Д.Сумъяабазар төрийн мөнгийг иргэн Б.Цэцэгийн дансаар дамжуулж төслийг санхүүжүүлээд байгаа юм уу? 

Төслийн удирдагчийн хувиар хэд хэдэн хэвлэлд өгсөн ярилцлага, өөрийн пэйжид тавьсан пост, олон нийтийн зүгээс өгч байгаа үнэлэлт зэргээс харахад Б.Цэцэг нарыг дэргэдээ авснаар Хотын дарга таны нэр хүнд 2024 оны орон нутгийн сонгуулиар унахаар байна шүү. Иймээс та энэхүү сонгон шалгаруулалтаа эргэн харж, Б.Цэцэгийг чөлөөлөх нь өнөөдөртөө хийж байгаа хамгийн зөв шийдвэр болохоор байна шүү. 

---