Насанд хүрэгчдийн боксын Ази тивийн аваргын шигшээ тулаанууд эхэллээ.
Хуваарь ёсоор өчигдөр эмэгтэй 12 жингийн шигшээ тулаан явагдаж дөрвөн жинд Энэтхэгийн боксчин, гурван жинд Казахстаны боксчид, Япон, Вьетнам, Солонгос, Узбекистан, Тайванын тус бүр нэг тамирчин аваргаллаа. Энэ өдөр манай улсаас -50кг жинд өсвөр үеийн Ази тивийн аварга, Үндэсний шигшээ баг, "Хилчин" спорт хорооны тамирчин Т.Номин-Эрдэнэ ДАШТ-ий хүрэл медальт, Азийн наадмын аварга, Ази тивийн хошой аварга БНСУ-ын тамирчин О Ён Жи-тэй тулалдаж ялагдсанаар мөнгөн медальтайгаар тэмцээнээ өндөрлүүллээ.
Түүний хувьд хүрэл медалийн төлөө Ази тивийн хошой аварга Казакстаны тамирчинг, мөнгөн медалийн төлөө залуучуудын Ази тивийн хошой аварга Тайландын тамирчныг ялж ийнхүү 19 насандаа тивдээ финалдсан юм.
Өнөөдөр тэмцээний сүүлийн өдөр эрэгтэй жингийн шигшээ тулаанууд явагдах ба манай улсаас Б.Буяндалай Йорданы Мохамед Абу Жажентэй тулалдана.
