Худалдаа, хөгжлийн банкны Хуулийн газрын захирал Т.Батжаргал, Байгууллагын банкны захирал Г.Ганцэцэг нарыг АТГ-ынхан эрүүгийн хэрэгт холбогдуулан шалгаад яллах дүгнэлт үйлдүүлэхээр болжээ.

Уг хоёр хүнийг албан тушаалын эрх мэдлээ урвуулан ашиглаж, Худалдаа, хөгжлийн банк болон түүний хувьцаа эзэмшигч нарт давуу байдал бий болгон Хөтөл дэх “Цемент шохой” ХК-д 2.3 тэрбум гаруй төгрөгийн хохирол учруулсан хэрэгт буруутгасан юм байна.

Хөтөлийн “Цемент шохой” ХК-ийг Худалдаа, хөгжлийн банкны хамаарал бүхий хүмүүсийн мэдлээс төрийн өмчид авах шийдвэр энэ оны гуравдугаар сарын 23-нд Засгийн газраас гаргасан билээ. Энэ үед тус компанийн борлуулсан цементийн орлого 4.3 тэрбум төгрөг дээрх банкны дансанд байж. Засгийн газраас шийдвэр гаргамагц уг мөнгийг Худалдаа, хөгжлийн банкныхан татан авсан нь төрийн өмчит компанид хохирол учруулсан үйлдэл гэж өнөөгийн удирдлага нь үзэн АТГ-т хандан шалгуулсан аж.

АТГ-ын Мөрдөн шалгах хэлтсийнхэн үүнээс өмнө Худалдаа, хөгжлийн банкны нэгэн салбарын захирал Э.Мөнхбаатар Даниел гэх хүнд 1.5 тэрбум төгрөгийн зээл олгохоор холбогдох нэгжүүдээрээ батлуулаад, түүнээсээ 45 саяыг нь хахуульд авсныг тогтоон яллах дүгнэлт үйлдүүлэхээр НПГ-т шилжүүлээд байгаа билээ.

---