МАН-ын Удирдах зөвлөл өнөөдөр /202.10.21/ хуралдаж зарим томилгоог эцэслэнэ.

Хөдөлмөр нийгмийн хамгааллын сайд Д.Сарангэрэл огцорсны дараа ЗГХЭГ-ын дарга Д.Амарбаясгалан түр орлож байсан. Өнөөдрийн УЗ-ийн хурлаар УИХ-ын гишүүн Т.Аюурсайханыг Хөдөлмөр, нийгмийн хамгааллын сайдаар томилохоор тохирчээ. 

Удирдах зөвлөлөөр түүнийг сайд болгохыг дэмжсэний дараа, Ерөнхий сайд УИХ-ын даргад нэрийг нь өргөн барина. Үндсэн хуульд орсон нэмэлт өөрчлөлтөөр сайдыг УИХ-ын гишүүд томилохгүй бөгөөд зөвхөн танилцуулсны дараа тангараг өргүүлнэ. 

Ингэснээр "Шударга тав" гэгдэж, 2017 оны эхээр УИХ-ын дарга асан М.Энхболдыг огцруулах жагсаал тэмцлийг өрнүүлж, улс төрийн акц хийж байсан таван хүн бүгд өндөр албан тушаал авах нь.

Тодруулбал,

-Л.Оюун-Эрдэнэ-Ерөнхий сайд

-Х.Нямбаатар-Хууль зүй, дотоод хэргийн сайд

-Л.Болд- Монгол Улсаас Люксембургийн Их Гүнт Улсад суух Онц бөгөөд Бүрэн эрхт Элчин сайд

-Ж.Батзандан- Монгол Улсаас Австрали улсад суух Элчин сайдын яамны зөвлөх

-Т.Аюурсайхан-Хөдөлмөр, нийгмийн хамгааллын сайд болох нь. 

"Шударга 5"-ын ахлагч Л.Оюун-Эрдэнээр ахлуулсан Засгийн газар нийтдээ 20 сайдтай байхаар бүтцээ баталсан. Одоо боомт хариуцсан сайдын томилгоо үлдсэн бөгөөд УИХ-ын гишүүн Ж.Мөнхбатыг томилохоор тохиролцсон гэх яриа улс төрчдийн дунд яригдаж байгаа билээ. 

---