Зам тээвэр, хөгжлийн дэд сайд Л.Халтар Улаанбаатар-Дархан чиглэлийн авто замын бүтээн байгуулалтын талаарх ээлжит мэдээллийг хүргэв. 

Тэрбээр:

-Багц-2 хэсэгт хучилт хийгдээгүй 5,9 км зам үлдсэн бол Багц-4 хэсэгт 24,5 км авто замын хучилт хийгдсэн.

Зам, тээврийн хөгжлийн яам, Улаанбаатар-Дархан чиглэлийн авто замын зөвлөх баг, Тээврийн цагдаагийн албаны төлөөллүүд ажиллаад хөдөлгөөний аюулгүй байдлыг хангах зорилгоор хаана ямар тэмдэг, тэмдэглэгээ хийх жагсаалтыг гаргасан.

Жагсаалт маргаашнаас /2022.10.20/ гүйцэтгэгч компанид ирж тэмдэг, тэмдэглэгээ хийсний дараа тухайн 24,5 км авто замын хөдөлгөөнийг нээнэ.

Багц-4 хэсэгт хучилт хийгдээгүй 6,2 км үлдсэний 4,1 км нь Хустайн даваа орчимд хучилт хийхэд бэлэн болсон. Үүнийг ирэх долоо хоногт дуусгана. Ингэснээр Баруунхараагийн Хараа голын гүүр, төмөр замын гармын хоёр талд 2 орчим км үлдэж байна.

Үндсэндээ Улаанбаатар-Дархан орох авто замд нийт 12,1 км хучилт хийгдээгүй үлдэж байна гэжээ. 

---