ОХУ-ын нийслэл Москва дахь цэргийн хэсэгчилсэн дайчилгааны зорилт бүрэн биелж, зарлан дуудах мэдэгдэл авсан иргэд бүртгүүлэх шаардлагагүй болсныг тус хотын дарга Сергей Собянин өнгөрөгч даваа гарагт зарлажээ.

Тэрээр энэ талаарх мэдэгдэлдээ "Ерөнхийлөгчийн зарлигийн дагуу Батлан хамгаалах яамнаас гүйцэтгэсэн хэсэгчилсэн дайчилгааны зорилтууд бүрэн биелсэн гэж Москвагийн цэргийн комиссар мэдээлсэн. Тиймээс иргэдийн оршин суугаа газар болон аж ахуйн нэгжүүдэд илгээсэн зарлан дуудах мэдэгдэл одоо хүчингүй болсон" хэмээн тэмдэглэсэн байна.

Үүний хүрээнд, Москва хотын цэргийн дайчилгааны төвүүд аравдугаар сарын 17-ны 14:00 цагт хаагдсан аж.

Ерөнхийлөгч Владимир Путин хэсэгчилсэн дайчилгаанд 300 мянган хүнийг хамруулна гэж зарласнаас одоогийн байдлаар 222 мянган нөөц цэргийг бүрдүүлээд байгаа ба үлдсэн бие бүрэлдэхүүнийг ойрын хоёр долоо хоногт дайчилна гэжээ.

Эх сурвалж: TASS

---