Улсын гуравдугаар төв эмнэлгийн Мэдрэл, зүрх судас, ерөнхий мэс засал, тархины харвалт, зүрхний шигдээсийн төрөлжсөн мэргэшлийн зөвлөх зэргийн эмч нарын бүрэлдэхүүнтэй баг энэ сарын 10-16-ны өдрүүдэд Баян-өлгий, Завхан аймгуудын нэгдсэн эмнэлгүүдэд томилолтоор ажиллажээ.

Тус эмч нарын баг орон нутгийн иргэд үйлчлүүлэгчдэд хамтарсан үзлэг оношилгоо, эмчилгээ хийн, эрүүл мэндтэй холбоотой тулгамдсан асуудлыг газар дээр нь хамтран шийдвэрлэж, эмч эмнэлгийн мэргэжилтнүүдийг ажлын байран дээр нь чадавхжуулах, мэргэжил арга зүйн зөвлөмж өгч, дэмжлэгт удирдлагаар хангаж ажиллажээ.

Гэмтлийн шалтгаант тархины мэс заслын дараах гавлын яс нөхөн сэргээх мэс засал, цөсний хүүдийн чулуутай гурван тохиолдолд цөсний хүүдий авах дурангийн мэс заслуудыг амжилттай хийсэн байна.

Төрөлжсөн мэргэшлийн нэгдсэн баг бүрэлдэхүүн томилолтын хугацаанд лавлагаа шатлалын тусламж шаардлагатай нийт 80 гаруй үйлчлүүлэгчид орон нутгийн эмч нарын багтай хамтран үзлэг, оношилгоо, эмчилгээ хийжээ. Тодруулбал хөлийн өнгөц венийн судасны өргөсөлтэй хүнд хэлбэрийн дөрвөн тохиолдолд судасны мэс засал, гэмтлийн шалтгаант тархины мэс заслын дараах гавлын яс нөхөн сэргээх мэс засал, цөсний хүүдийн чулуутай гурван тохиолдолд цөсний хүүдий авах дурангийн мэс заслуудыг амжилттай хийжээ.

Мөн Завхан аймгийн нэгдсэн эмнэлгийн дэмжих төвд урьдчилан сэргийлэх үзлэгийн зорилгоор төсвийн хөрөнгө оруулалтаар суурилагдсан зүрхний ачаалалтай бичлэгийн аппаратыг ажиллагаанд оруулж, эмч мэргэжилтнүүдэд сургалт хийн зүрхний ачаалалтай бичлэгийн шинжилгээг хийж эхлүүлэхэд дэмжлэг үзүүлж ажилласан байна.

Орон нутгийн нэгдсэн эмнэлгүүдийн холбогдох мэргэжлийн эмч нарт захын болон венийн судасны эмгэгийн эмчилгээний менежмент, титэм судсан дотуурх эмчилгээний дараах антиагрегант эмчилгээ, тархины харвалт ба бүлэн уусгах эмчилгээний протокол зэрэг сэдвүүдээр сургалт мэдээлэл хийж ажиллажээ.

---