Украины нийслэл Киев хот өнөөдөр өглөө Оросын камиказе дрон буюу нисгэгчгүй онгоцнуудын цохилтод өртсөнийг орон нутгийн эрх баригчид мэдээлэв.

Халдлага хотын төвийн Шевченковский дүүрэгт гарсан бөгөөд төв вокзалын ойролцоо хэд хэдэн дэлбэрэлт болж, орон сууцны барилгууд эвдэрсэн гэж Киев хотын дарга Виталий Кличко хэлсэн байна. Мөн орон сууцны бус нэг барилгад гал гарсан бөгөөд онцгой байдлын албаныхан болон түргэн тусламжийн эмч нар газар дээр нь ажиллаж байгаа гэсэн юм.

Одоогоор хүний амь нас хохирсон явдал бүртгэгдээгүй байгаа ч Шевченковский дүүрэгт өнгөрсөн долоо хоногт болсон халдлагуудын улмаас 19 хүн амиа алдаж, 100 гаруй хүн шархдаад байгаа билээ.

Украины цэргийн албаныхны тодорхойлсноор, камиказе дрон нь пуужингаас хямд бөгөөд боловсронгуй бус ч эх газар дээрх байг сүйтгэхдээ үр дүнтэй байдаг аж. Тэгвэл Европын Холбооны Гадаад хэргийн сайд нар өнөөдөр Люксембургт уулзах үеэрээ Украины 15 мянган цэргийг сургах, мөн Киевт дахиад 500 сая еврогийн зэвсгийн нэмэлт тусламж илгээх талаар тохиролцох төлөвтэй байгааг "Ройтерс" агентлаг мэдээлжээ.

Ташрамд дурдахад, Украины Ерөнхийлөгч Владимир Зеленский өнгөрсөн ням гарагийн орой хийсэн ээлжит мэдэгдлийнхээ үеэр Оросын бараг 65 мянган алба хаагч амь үрэгдсэн гэж зарласан бол энэ нь Москвагийн есдүгээр сарын 21-нд гаргасан 5,937 гэх албан ёсны тооноос хамаагүй өндөр үзүүлэлт юм.

Эх сурвалж: The Guardian

---