Украины өмнөд хэсгийн Херсон мужийн Москвагаас томилогдсон удирдагч Владимир Сальдо энгийн иргэдийг нүүлгэн шилжүүлэхийг уриалжээ.

Түүний хэлснээр, Украины цэргийн хүчин тус бүс нутгийн олон хот, тэр дундаа Херсон, Новая Каховка зэрэг хоёр том хотыг өдөр бүр бөмбөгдөж байгаа аж. Тиймээс ноён Сальдо иргэдийг "өөрсдийгөө аврахын тулд" Орос руу явахыг уриалж, Кремлийн эрх баригчдаас тусламж хүссэн байна.

Тэгвэл ОХУ-ын Шадар сайд Марат Хуснуллин энэхүү арга хэмжээг дэмжиж буйгаа илэрхийлэн, "Засгийн газар Херсон мужийн оршин суугчдыг бусад бүс нутаг руу нүүлгэн шилжүүлэхэд тусламж үзүүлэх шийдвэр гаргасан. Бид хүн бүрийг үнэ төлбөргүй орон байр болон шаардлагатай бусад бүх зүйлээр хангана" гэж мэдэгджээ. Херсоноос явсан иргэдийн эхний хэсэг өнөөдөр Оросын Ростов мужид ирнэ гэж тус мужийн захирагч Василий Голубев мэдээлсэн юм.

Оросын зэвсэгт хүчин өнгөрсөн хоёрдугаар сард Украинд түрэмгийлж эхэлснээсээ хойш эзэлсэн цорын ганц бүс нутгийн нийслэл нь Херсон хот билээ. Харин одоо Украины цэргүүд Херсон мужид хурдацтай урагшлан, баруун хойд хэсгийн зарим хотыг чөлөөлсөн бөгөөд нийслэл Херсонд ойртож байна. Харин Украины агаарын довтолгоо улсынхаа иргэдийг онилж байгаа гэх мэдээллийг Киевийн эрх баригчид эрс няцаажээ. 

Эх сурвалж: BBC

---