ОХУ-аас Аляскын Гэгээн Лоренс арал дээр жижиг завиар ирсэн хоёр иргэнийг АНУ-ын албаныхан саатуулсан гэж мэдээлжээ. Тус муж улсын эрх баригчдын хэлснээр, орос эрчүүд Гамбелл тосгоны эрэгт газардсаныхаа дараа АНУ-аас орогнол хүссэн байна.

Гэгээн Лоренс арлын баруун хойд хошуунд байрлах Гамбелл нь 500 гаруй байнгын оршин суугчтай жижиг тосгон бөгөөд Оросын Чукотын хойгоос 56 км-ийн зайд оршдог аж.

Дүрвэгсэд Оросын зүүн хойд хэсгийн Эгвекинот хотоос завь хөлөглөн 480 орчим км замыг туулж ирсэн гэж орон нутгийн бичиг хэргийн ажилтан хэлжээ. АНУ-ын Дотоод аюулгүй байдлын яамны мэдээлснээр, өнгөрөгч мягмар гарагт ирсэн хоёр орос иргэнийг "шалгалт, үзлэг"-т хамруулахаар Аляскын хамгийн том хот болох Анкориж руу онгоцоор авч явсан аж. Одоо тус яамны зүгээс ​​орогнол хүссэн иргэдийн өргөдлийг хууль ёсны дагуу хэлэлцэж байгаа гэнэ.

ОХУ-ын Ерөнхийлөгч Владимир Путин өнгөрөгч есдүгээр сарын 21-нд цэргийн хэсэгчилсэн дайчилгаа зарласнаас хойш 700 мянга орчим иргэн эх орноосоо дүрвэн гарсан гэж "Forbes Russia" сэтгүүлийн энэ долоо хоногийн тайланд дурджээ. Ихэнх хүн хөрш зэргэлдээ Казахстан, Гүрж, Финланд болон Европын бусад орныг зорьсон ч Аляска руу дүрвэсэн тохиолдол анх удаа бүртгэгдээд байна.

Эх сурвалж: BBC

---