Украины цэргийн хүчин Херсон мужийн томоохон хот, тосгонуудыг чөлөөлж, Оросын цэргүүдийг түлхэн гарган, өмнөд зүг рүү урагшилж байгааг тус улсын Батлан хамгаалах яам мэдэгджээ. Ийнхүү Ерөнхийлөгч Владимир Путин улсдаа нэгтгээд буй Украины дөрвөн муж бүгд Оросын армийн бүрэн хяналтаас гараад байна.

Тус мужийн нийслэл Херсон хот Оросын мэдэлд хэвээр байгаа ч Днепр мөрний хойд хэсэг дэх хяналт нь суларсаар байгаа юм. Украины цэргүүд өнгөрсөн 48 цагийн дотор мөрний баруун эрэг дагуу хурдацтай урагшилж, улмаар Оросын анги нэгтгэлүүд мужийн хойд хэсгийн хэд хэдэн сууринаас ухрахаас өөр аргагүйд хүрчээ.

Ерөнхийлөгч Владимир Зеленскийн мэдээлснээр, Украины арми Любимовка, Хрещеновка, Золота Балка, Беляевка, Украинка, Великая Александровка, Малая Александровка зэрэг тосгоныг чөлөөлсөн ба үүнээс гадна олон тооны хот суурин байгаа аж. Харин Украины Дотоод хэргийн дэд сайд Евгений Енин хэлэхдээ, Херсон мужийн 50 хот, тосгоныг эргүүлэн авч, 3,500 орчим иргэнийг чөлөөлсөн гэсэн юм.

Дашрамд дурдахад, АНУ-ын Ерөнхийлөгч Жо Байден өнгөрөгч мягмар гарагт ноён Зеленскийтэй утсаар ярьж, ОХУ Украины газар нутгийг өөртөө нэгтгэснийг хэзээ ч хүлээн зөвшөөрөхгүйгээ илэрхийлсэн бөгөөд 625 сая ам.долларын нэмэлт тусламжийн багцыг санал болгожээ.

Эх сурвалж: BBC

---