Куба улсыг дайрсан Иан хар салхины улмаас нэг хүн амь үрэгдэж, сая орчим иргэн тог цахилгаангүй болжээ.

Тус байгалийн гамшигт үзэгдлийн үеэр салхины хурд 195 км/цагт хүрсэн тул орон нутгийн эрх баригчид зургаан бүс нутагт онц байдал зарлаж, далайн эрэг орчмоор хүчтэй шуурга дэгдэж, үер буун, хөрсний гулгалт үүсэх аюултайг сэрэмжлүүлсэн байна. Албаныхны мэдээлснээр, Пинар дель Рио мужид оршин суудаг 43 настай эмэгтэйн байшингийн хана нурсны улмаас тэрээр амиа алджээ. Кубын Ерөнхийлөгч Мигель Диас Канел тус бүс нутагт зочилж, нөхцөл байдалтай танилцсан бөгөөд мужийн иргэд энэхүү гай зовлонг даван туулж чадна гэдэгт итгэлтэй байгаагаа илэрхийлсэн байна.

Гуравдугаар ангилалд хамаарах Иан хар салхи одоо АНУ-ын Флорида мужийг чиглэн хөдөлж байгаа ба хүч нь улам нэмэгдэж, дөрөвдүгээр ангилал болж хувирах төлөвтэй байна. Флоридагийн зарим хэсэг ийм хүчтэй хар салхинд сүүлийн зуун жилд өртөж байгаагүй юм. Тэгвэл тус мужид хоёр сая гаруй хүнийг нүүлгэн шилжүүлэх ажиллагааг эхлүүлээд байна.

Эх сурвалж: BBC

---