ХХААХҮЯ-наас “Намрын ногоон өдрүүд-Үндэсний үйлдвэрлэл 2022” нэгдсэн арга хэмжээг 17 дахь жилдээ уламжлал болгон зохион байгуулж байгаа билээ.

Арга хэмжээнд нийслэл, хөдөө орон нутгийн 400 гаруй үйлдвэрлэгч, тариаланчид нийт 2000 орчим төрлийн шинэ ургацын хүнсний ногоо, бараа бүтээгдэхүүнтэй оролцож байна. Тодруулбал, дотоодын үйлдвэрлэгчид энэ сарын 18-25-ны өдрүүдэд Төв цэнгэлдэх хүрээлэнд бараа, бүтээгдэхүүнээ үйлдвэрийн үнээр борлуулах юм.

Үндэсний үйлдвэрлэгч:

-Дорнод аймгийн Халхгол сумаас “Халхгол Уран зөгий” брэнд бүтээгдэхүүнээ борлуулахаар ирсэн. Энэ арга хэмжээнд тав дахь жилдээ оролцож байна. Зөгийн бал хэрхэн гардагийг худалдан авагч нартаа харуулах зорилгоор үзүүлэн болгож, зөгийнүүдээ зориулалтын шилэн саванд хийж авчирсан. Хоёр төрлийн зөгийн бал зарж байна. Үнийн хувьд 1 кг нь 35 мянган төгрөг, 500 гр нь 17,500 төгрөгийн ханштай байна гэлээ.

-Арвайн гурил, гар хийцний модон эдлэлээ худалдан борлуулахаар үзэсгэлэнд оролцож байна. Хуванцар савны хэрэглээг халах зорилготойгоор модон хувинг манай “Хайнаг толгой” хоршооныхон хийж эхэлсэн гэв. 

-Баянхонгорт төдийгүй улсад алдартай Баянхонгор аймгийн Богд сумын ааруултай ирсэн. Манай брэнд бүтээгдэхүүнүүдийн нэг нь “ааруулан набор” юм. Мөн үхрийн борц, /1 кг нь 60 мянга/ бэлгийн багц, шимийн архи зэргийг борлуулж байна. Иргэдийн худалдан авалт маш сайн байна гэж харж байна. Энэ жил анх удаагаа үзэсгэлэн худалдаанд оролцож байна. Арга хэмжээний зохион байгуулалт маш сайн байна гэлээ. 

“Хужирт цагаан” ХХК-ийн төлөөлөл:

-Манайх 2017 оноос өрхийн үйлдвэрлэл явуулж эхэлсэн бол 2021 онд компани болон өргөжсөн. Өвөрхангай аймгийн Хужирт сумандаа шар сүү, цагаан идээгээ ашиглан нийт 30 гаруй төрлийн бүтээгдэхүүн үйлдвэрлэдэг. Тухайлбал, шар сүүний чихэр, бурам зэргийг ямар нэгэн химийн бодис ашиглалгүйгээр, эрүүл мэндийг дэмжих бүтээгдэхүүн хийдгээрээ онцлогтой гэв. 

---