Украины арми өнгөрөгч мягмар гарагт Харьков мужийг бүрэн хяналтдаа оруулж, Оросын цэргүүдийн сүүлийн зургаан сарын турш эзлээд байсан газар нутгийг эргүүлэн авч, хот, тосгодод тугаа мандуулжээ.

Тус улсын хилийн албаны мэдээлснээр, цэргүүд олон улсын хилээс хэдхэн километрийн зайд орших Вовчанськ хотыг чөлөөлсөн бөгөөд Оросын цэргийн хүчин ням гарагт ухарсан аж. Украины цэргийн хүчин сүүлийн хэдхэн хоногийн дотор 6,000 гаруй км.квадрат газар нутгийг буцаан авч, оросуудыг шахан гаргаад байгаа юм.

Оросын батальонууд одоо Изюм хотоос 16 км-ийн зайд орших Оскил голын зүүн талд байрлал эзлээд байгаа ба улмаар Донбасс дахь цэргийн ажиллагаандаа ашиглаж байсан чухал зангилаа хотоо алджээ. Сүүлийн таван сарын турш ОХУ-ын мэдэлд байсан Изюм хот бараг бүхэлдээ сүйрч, мянга гаруй оршин суугч нь амь үрэгдсэнийг Киевийн эрх баригчид хэлжээ.

Харьков мужийг буцаан авах сөрөг довтолгооны өмнөх хэдэн долоо хоногийн хугацаанд АНУ-ын албаныхан Украинд стратеги хэрэгжүүлэхэд тусалсан гэж эх сурвалжууд тэмдэглэсэн юм. Сүүлийн үед Украины командлагчид АНУ, Британийн тагнуулын алба, цэргийн мэргэжилтнүүдтэй илүү их харилцаж, зөвлөгөө авч эхэлснийг "New York Times" сонинд мэдээлсэн байна.

Эх сурвалж: The Guardian

---