БНАСАУ өөрсдийгөө цөмийн зэвсэгтэй орон хэмээн албан ёсоор тунхагласан хуулийг баталсан талаар тус улсын төрийн мэдлийн "KCNA" агентлаг мэдээлжээ.

Мөн Умард Солонгос өөрсдийгөө хамгаалахын тулд урьдчилан сэргийлэх цөмийн цохилт өгөх эрхийг уг хуулиар баталгаажуулсан байна. Тус улсын удирдагч Ким Жон Ун энэхүү шийдвэрийг "эргэшгүй алхам" гэж нэрлээд, цөмийн зэвсгээс ангижрах талаар ямар нэгэн яриа хэлэлцээ огт хийхгүй гэж мэдэгдсэн юм.

Дэлхийн улс орнуудын зүгээс өргөн хүрээний хориг арга хэмжээ авсан хэдий ч Пёньян 2006-2017 оны хооронд зургаан удаагийн цөмийн туршилт хийсэн билээ. Түүнчлэн НҮБ-ын Аюулгүйн Зөвлөлийн тогтоолыг зөрчин, цэргийн хүчин чадлаа нэмэгдүүлж, хөрш орнуудаасаа гадна АНУ-ыг хүртэл цөмийн зэвсгээрээ заналхийлсээр байгаа юм.

Ким Жон Ун 2019 онд тухайн үеийн АНУ-ын Ерөнхийлөгч Дональд Трамптай хоёр ч удаа дээд хэмжээний уулзалт хийсэн боловч энэ нь тодорхой үр дүнд хүрээгүй ба Умард Солонгос алсын тусгалтай пуужингууд хөөргөж, цөмийн туршилтаа үргэлжлүүлсэн. Харин одоо эдгээр хоёр улс хоорондын яриа хэлэлцээ зогсонги байдалд орсон бөгөөд Ерөнхийлөгч Жо Байдены засаг захиргаа Пёньянтай ярилцахад бэлэн гэдгээ мэдэгдсэн ч хоёр удирдагч уулзах эсэх нь тодорхойгүй байна.

АНУ өнгөрсөн онд Умард Солонгосын бодлогоо эргэн харж, Солонгосын хойгийг цөмийн зэвсгээс бүрэн ангижруулах нь гол зорилго гэдгийг дахин баталгаажуулсан билээ. Гэвч Пёньян энэ жил урьд өмнөхөөсөө их баллистик пуужин харваснаар Солонгосын хойгийн хурцадмал байдал улам дордоод байгаа ба үүний хариуд, Өмнөд Солонгос болон АНУ мөн пуужин харваж, сүүлийн жилүүд дэх хамгийн том хамтарсан цэргийн сургуулилалтыг хийсэн юм.

Эх сурвалж: BBC

---