7134 метрийн өндөртэй Памирын нурууны Ленин оргилд соло авиралт хийж явсан Цэгц клубийн тэргүүн Х.Бумхишиг хөлөө хөлдөөсний улмаас 5800м өндрөөс бууж чадахгүй гацсан талаар өчигдөр мэдээлсэн билээ.

Тэгвэл өчигдөр буюу 2022 оны есдүгээр сарын 8-ны өдөр аврах ажиллагаа явуулахаар МУҮХ-ны Аврах ажиллагаа, эрсдэлийн удирдлага хариуцсан дэд ерөнхийлөгч С.Ганхүү, Жаргалант клубийн уулчин Э.Даваадорж нар Улаанбаатараас Кыргызстаныг зорьжээ. 

Одоогийн байдлаар аврах баг Оше хотод бэлтгэл ажлаа хийн, ажиллагаанд оролцох хоёр хүн олсон байна.

Энэ талаар Монголын уулчдын үндэсний холбооноос "Киргиз улсад авиралт хийж байгаад эрсдэлд ороод буй залуу уулчны нөхцөл байдалд санаа чилээж буй нийт уулчид, уулын спортын дэмжигч та бүхэндээ талархал илэрхийлье. 

Холбооны Аврах ажиллагаа хариуцсан Дэд ерөнхийлөгч С.Ганхүүгээр ахлуулсан аврах баг Оше хотод бэлтгэл ажлаа хийн, Kyrgyz Alpine Club-ийн дэмжлэгтэйгээр аврах ажиллагаанд оролцох хоёр уулчин олоод байна. Яг энэ цаг үед Коржиневский оргилд авиралт хийж байсан уулчид аврах тусламжийн дохио илгээсэн нөхцөл байдал давхцаад байна. Киргизээс уулчдын баг бүрдүүлж эхэлсэн бөгөөд уулчид хүрэлцээ муу байгаа бололтой.

Монголын Уулчдын Үндэсний Холбоо болон гишүүн клубын төлөөлөл бүхий бүрэлдэхүүн тус мэдээг хүлээж аваад шуурхай зохион байгуулалтанд орж Киргиз улсад газар дээр нь зөв мэдээллийг хурдан авч, хамгийн тохиромжтой цаг алдахгүй шийдвэр гаргахаар очсон байгаа нь давуу талыг бий болголоо.

Маргааш буюу есдүгээр сарын 10-ны өдөрт багтан эрсдэлд ороод буй уулчин дээр хүрэх төлөвлөгөөтэй байна. Тус ажиллагааг амжилттай зохион байгуулахад олон нийтээс 2,300,000 төгрөгийн хандив цуглаад байна. Та бүхний сэтгэлийн тусламж энэ цаг мөчид маш өндөр ач холбогдолтой байгаа бөгөөд хамтран ажиллаж буй та бүхэнд Холбооны зүгээс дахин талархал илэрхийлье" гэлээ. 

Дашрамд дурадахад, уулчдад туслах аян эхлүүлсэн бөгөөд 5077279930 Хаан банк /С.Ганхүү/ дансанд хандив илгээх боломжтой. 

 

---