Улаанбаатар хотын номер-1 асуудал болох утааг өнгөрсөн хугацаанд бууруулж чадсан амжилт дээрээ дөрөөлж, 2020 оны сонгуулиар эрх баригч Монгол ардын нам "түгжрэлийг мэдэгдэхүйц багасгана" хэмээн амлаж ялалт байгуулсан билээ. Энэхүү амлалтыг биелүүлэх хугацаа хоёр оны дараа "дуусах" гэж байна.

Толгой мэдэн хариуцах ёстой Нийслэлийн Засаг дарга "ажил ихтэй" учир Монгол улсын сайд хэмээх албан тушаалыг тусгайлан гаргаж, түүнтэй гар нийлэн ажиллуулахаар болоод байгаа. Түгжрэлийг бууруулахгүй бол 2024 онд МАН нийслэлд ялах нь эргэлзээтэй болно.

Иймд, энэхүү асуудлыг Нийслэл Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгж /УТҮГ/-д хариуцуулсан агаад эхний ажилдаа "ханцуй шамлан" орсон бололтой. Гадаадын зээл тусламж /түгжрэлийг бууруулахад/-д шаардагдах техникийн туслалцаа, зөвлөх үйлчилгээний тендерийг саяхан зарлажээ. Энэхүү ажлыг 1.8 тэрбум төгрөгөөр гүйцэтгүүлэх аж.

Өөрөөр хэлбэл, аль нэгэн аж ахуйн нэгж түгжрэлд зөвлөгөө өгөх нэрийдлээр 1.8 төгрөг "халаасалж" болох нь ээ. Энэ нь иргэдийн дургүйцлийг төрүүлж эхлээд байна. Олон улсын тендерийн материал бүрдүүлэх, хяналт шалгалт хийх чадамжтай хүн Нийслэлд байхгүй гэдэгт иргэд итгэхгүй байгаа юм. 

Нийслэлийн удирдлагуудад түгжрэлийг бууруулахын тулд урьд хожид байгаагүй их мөнгө буюу 420 тэрбум төгрөг захиран зарцуулах мэдлийг өгөөд байгаа. 420 тэрбум төгрөг энэ мэт зөвлөх үйлчилгээнд яваад байвал 1-2 жилийн дотор нүдэнд харагдахуйц үр дүн гарна гэж хүлээлтгүй болж байгаа юм. 

---